एजेन्सी । भारतको गुजारतस्थित सरकारी अस्पतालमा कोरोनाभाइरसका संक्रमित हिन्दु र मुस्लिमलाई छुट्टाछुटै वार्डमा राखिएको छ ।अहमदावादको अस्पतालले सरकारी आदेश भन्दै हिन्दु र मुस्लिम बिरामीलाई छुट्टाछुट्टै राखेको हो ।
’विषेशगरी त्यहाँ महिला र पुरूष बिरामीको छुट्टाछुटै वार्ड रहेको छ । तर हामीले हिन्दु र मुस्लिम बिरामीहरूका लागि पनि छुट्टाछुटै वार्ड बनाएका छौं,’अहमदावाद सिभिल अस्पतालका मेडिकल सुपरिटेन्डेन्ट डाक्टर गुनभन्त एच राथोडले भने,’यो निर्णय सरकारकै हो र उहाँहरूलाई सोध्न सक्नुहुन्छ ।’
गुजरातका उपमुख्यमन्त्री तथा स्वास्थ्य मन्त्री नितिन पटेलले त्यस्तो अस्पतालमा त्यस्तो केही नभएको बताएका छन् ।’बिरामीलाई चाहिने सबै खालको उपचार दिइरहेका छौं,’उनले भने। र थप कुरा गर्न चाहेनन् ।
एक बिरामीले इन्डियन एक्स्प्रेससँग भने,’आइतबार राति ए–४ पहिलो वार्डमा भर्ना भएका २८ पुरूषलाई सी–४ अर्को वार्डमा राखिएको थियो। हामीलाई किन स्थानान्तरण गरियो भन्ने कसैले बताएका थिएनन् तर हामी एउटै समुदायका थियौ । एक स्टाफसँग कुराकानी गर्दा उनले दुबै समुदायको सहजताका लागि यसो गरेको बताए ।’
कोरोना भाइरसको उपचारका लागि उक्त अस्पतालमा कम्तिमा पनि १५० जना भर्ना भएका छन्। जसमध्ये ४० जना मुस्लिम रहेको बताइएको छ ।
गुजरात प्रदेश सरकारका मुख्यमन्त्री भारतीय जनता पार्टीका छन । यसअघि २००१ देखि २०१३ वर्षसम्म लगातार नरेन्द्र मोदी त्यहाँका मुख्यमन्त्री थिए ।
वि.सं.२०७७ वैशाख ५ शुक्रवार १३:५७ मा प्रकाशित