काठमाडौं । काठमाडौं महानगरपालिकाले विदेशबाट फर्किएर आएका चार सय ६४ जनाको कोरोना परीक्षण गरेको छ । महानगरपालिकाले विदेशबाट फर्किएर आएका तथा उनीहरूको सम्पर्कमा रहेकाको र्यापिड डाइग्नोस्टिक टेस्ट (आरडिटी) गरेको हो ।
पेप्सीकोलास्थित सनसिटी अपार्टमेन्टमा बस्ने दुईजनामा कोरोना संक्रमण भएको पुष्टि भएपछि महानगरले उनीहरूको सम्पर्कमा आएका तथा विदेशबाट फर्किएर महानगरभित्र आफ्नै घरमा सेल्फ क्वारेन्टाइनमा बसोवास गरिरहेकाहरूको र्यापिड टेस्ट गरेको हो ।
शनिबारसम्म चार सय ६४ जनाको परीक्षण हुँदा सबैको नजिता नेगेटिभ रहेको महानगरका सहरी स्वास्थ्य महाशाखाका प्रमुख नरेन्द्रविलास बज्राचार्यले बताए ।
महानगरले शनिबार वडा नम्बर ५ का ३९ जना, वडा नम्बर ४ का ५१ जना र वडा नम्बर १८, १९, २०, २१, २२, २३, २४, २९ गरी आठवटा वडाका ७८ जनाको परीक्षण भएको जनाएको छ ।
यस्तै, वडा नम्बर ९, १०, ३१ र ३२ मा भएको परीक्षणमा दुई सय ४८ जना र वडा नम्बर १५ मा ४८ जनाको परीक्षण भइसकेको स्वास्थ्य महाशाखाले जनाएको छ ।
वि.सं.२०७७ वैशाख ८ सोमवार ०८:१८ मा प्रकाशित
