काठमाडौं । विश्वव्यापी महामारीबाट अमेरिका, स्पेन, इटाली जस्ता मुलुकहरुमा भयावह अवस्था सिर्जना गरिरहेको छ । आइतबार मध्यान्हसम्म नौ लाख ६० हजार संक्रमित भएको अमेरिकामा ५४ हजार बढीको मृत्यु भइसकेको छ ।
अमेरिकामा बिरामी निको हुने दर पनि न्यून छ । अहिलेसम्म एक लाख १८ हजार बिरामी निको भएका छन् भने सात लाख ८८ हजार बिरामी उपचारत छन् । तर, यो विश्वव्यापी महामारीबाट ६ देशले पनि सतशत प्रतिशत बिरामी निको बनाएका छन् ।
ग्रिनल्याण्ड, सेन्ट लुसिया, क्यारिबियन नेदरल्याण्ड्स, यमन, साओ टोमे र प्रिन्सिपेमा सवै संक्रमित निको भएका छन् । ग्रिनल्याण्डमा एघार जना र सेन्ट लुसियामा १५ जनामा संक्रमण देखिएको थियो । ती सवै बिरामी निको भएका छन् ।
सेन्ट बार्थलेमीमा ६, यमनमा एक, क्यारिबियन नेदरल्याण्ड्समा पाँच र साओ टोमे र प्रिन्सिपेमा चार संक्रमित भेटिएका थिए । ती सबै बिरामी निको भइसकेका छन् । अहिले यी ६ वटै देशमा कुनै पनि संक्रमण देखिएको छैन ।
दक्षिण एसियामा कुनै पनि मुलुकले शतप्रतिशत बिरामी निको बनाइसकेका छैनन् । तर, निको बनाउनेमा भने राम्रै नतिजा देखिन्छ । सात जना संक्रमित भेटिएको भुटानमा तीन जना निको भइसकेका छन् । नेपालमा ५१ मध्ये १२ जना निको भइसकेका छन् । दक्षिण एसियामा सवैभन्दा पहिले नेपालमा संक्रमण देखिएको थियो ।
बिरामी निको बनाउने देशहरुमा कम्बोडिया, जिब्राल्टर, सुरिनाम, गाम्बिया, डोमिनिका लगायत देशहरु अगाडि छन् । कम्बोडियामा १२२ संक्रमति मध्ये ११७, सुरिनाममा दश संक्रमित मध्ये सात, गाम्बियामा दश संक्रमित मध्ये आठ, डोमिनिकामा १६ संक्रमित मध्ये १३ बिरामी निको भइसकेका छन् । यी थोरै संक्रमण देखिएको देश भए ।
धेरै संक्रमित देखिएर तुलनात्मक राम्रो उपचार भएको देशहरु दक्षिण कोरिया, अष्ट्रेलिया, इराक, आइसेल्याण्ड, न्यूजिल्याण्ड, लक्जेम्बर्ग, डेनमार्क लगायत छन् । धेरै बिरामी निको बनाउने र लगभग नियन्त्रण गर्ने मुलुक भने चीन नै हो ।
८२ हजार संक्रमित भेटिएकोमा चीनले ७७ हजार बिरामी निको बनाए । ४६ सय बिरामीको मृत्यु भयो । अहिले चीनमा बिरामी संख्या ८०१ जना छन् ।
विश्वभर २९ लाख संक्रमित भेटिएकोमा अहिलेसम्म ८ लाख ३७ हजार बिरामी निको भएका छन् भने दुई लाख तीन हजार बढीको मृत्यु भएको छ ।
वि.सं.२०७७ वैशाख १४ आइतवार १४:३३ मा प्रकाशित
