सुर्खेत । कर्णाली प्रदेशमा आन्तरिक काम गर्ने गरी सरकारी कार्यालय खुलेका छन । तत्कालका लागि अन्य सेवा प्रवाह नगरी आन्तरिक काम गर्न सबै सरकारी कार्यालय खुलेका हुन् ।
कार्यालय खुले पनि सेवाग्राहीका नियमित काम भने गरिने छैन । लकडाउन भएपछि एक महिनायता अत्यावश्यक बाहेकका सरकारी कार्यालय बन्द थिए ।
लकडाउनकै अवस्थामा गत विहीबार प्रदेश विपद् व्यवस्थापन केन्द्रले प्रदेशभित्रका सबै सरकारी कार्यालय सञ्चालनमा ल्याउने निर्णय गरेको थियो ।
सरकारका प्रवक्ता एवं भूमि व्यवस्था, कृषि तथा सहकारी मन्त्री विमला केसीले सरकारी कार्यालयबाट अहिले आन्तरिक काम मात्रै हुने जानकारी दिनुभयो ।
आगामी वर्षका लागि कार्यक्रम र बजेटको तयारी गर्नुपरेकाले कार्यालयहरु सञ्चालनमा ल्याइएको उहाँले बताउनुभयो । ‘चालु आर्थिक वर्षको अन्तिममा छौँ। आगामी वर्षका लागि कार्यक्रम र बजेट तय गर्नुपर्ने छ,’ मन्त्री केसीले भन्नुभयो, ‘कर्मचारीले सुरक्षा सावधानी अपनाइ काम गर्नुहुन्छ।’
वि.सं.२०७७ वैशाख १४ आइतवार १५:०० मा प्रकाशित
