काठमाडौं । कोरोना संक्रमणबाट दुबईमा एक नेपाली युवाको मृत्यु भएको छ । सुनसरी धरान–११ कल्याण चोकका अमर बान्तवा राई नाम गरेका युवाको एकसाता अघि एक अस्पतालमा निधन भएको हो ।
कारोना संक्रमणबाटै मृत्यु भएको मेडिकल रिपोर्ट कम्पनीले धरानमा रहेका उनका परिवारलाई पठाएको छ । कोरोना भाइरसको संक्रमणबाट मृत्यु भएको कारण अमरको शव दुबईमा नै अन्त्येष्टि गरिने र त्यसको लागि स्वीकृतिको सिफारिस वडाले पठाइसकेको छ ।
क्वारेन्टाइनमा रहेको खबर पाएका परिवारले पछि आइसोलेशनमा लैजाँदै गरेको जानकारी पाएका थिए । त्यसपछि उनको एकै पटक निधनको खबर आएको हो ।
दुबईमा लामो समयदेखि कार्यरत मृतक राई एक बर्षअघि मात्र बिदामा आएर फर्किएका थिए । मृतक राईकी श्रीमती र एक छोरी छन् ।
वि.सं.२०७७ वैशाख १६ मंगलवार ०८:२८ मा प्रकाशित