काठमाडौं । बाँकेको नेपालगञ्ज उपमहानगरपालिका क्षेत्रलाई भोलि(मंगलबार)देखि तीन दिनसम्म निषेधित क्षेत्र घोषणा गरिने भएको छ ।
कोरोना भाइरस (कोभिड–१९) को संक्रमण दर न्यूनिकरणका लागि तीन दिन गर्न तथा स्वाब परीक्षणलाई प्रभावकारी बनाउन निषेधित क्षेत्र घोषणा गरिने भएको हो ।
प्रमुख जिल्ला अधिकारी कुमार खडकाको अध्यक्षतामा आज बसेको कोरोना संटक व्यवस्थापन सम्वन्धी सर्वदलीय/सर्वपक्षीय बैठकले कोरोना भाइरस संक्रमण दर न्यूनिकरणका साथै संक्रमितको कन्याक्ट ट्रेसिङ र स्वाब परीक्षणलाई प्रभावकारी बनाउन उक्त निर्णय गरेको हो ।
बैठकले मंगलबार बिहान ११ बजेदेखि बैशाख २५ गते मध्यरातिसम्म नगर क्षेत्र निषेधित गर्न सिफारिस गरेको हो । उक्त अवधिमा स्वास्थ्यकर्मी, सुरक्षाकर्मी, कन्ट्याक्ट ट्रेसिङ र स्वाब संकलनमा खटिनेवाहेक कोही पनि बाहिर निस्कन नपाउन प्रमुख जिल्ला अधिकारी कुमार खड्काले जानकारी दिनुभयो ।
नेपालगञ्जमा हालसम्म १६ जनामा कोरोना संक्रमण देखिएको छ। कोरोना संक्रमितको सम्पर्कमा आएका केहीको स्वाब परीक्षण भैरहेको छ।
वि.सं.२०७७ वैशाख २२ सोमवार १८:५९ मा प्रकाशित
