काठमाडौं । विश्वभर कोरोना भाइरस (कोभिड-१९) संक्रमणबाट ज्यान गुमाउनेको संख्या २ लाख ५१ हजार ९ सय ४७ पुगेको छ । संक्रमणबाट गएको २४ घण्टामा मात्रै ३८ सय भन्दा धेरैले जीवन गुमाएका छन् ।
विश्वका २ सयभन्दा बढी मुलुक फैलिइसकेको कोरोना भाइरसको संक्रमणका कारण मानिसको ज्यान जाने क्रम जारी छ । कोरोना भाइरसको महामारी सारा विश्वले नै झेलिरहेको छ ।
विश्वका लागि स्वास्थ्य चुनौती बनेको कोरोना भाइरसका कारण विश्वका एक चौथाइ मानिस घरिभत्रै बस्न बाध्य छन् । विश्व स्वास्थ्य संगठनको पछिल्लो अपडेट अनुसार अहिलेसम्म विश्वभर ३६ लाख ४१ हजार २ सय ४ जना संक्रमित भएका छन् ।
सोमबार मात्रै विश्वमा ७७ हजार ५ सय १५ जना नयाँ संक्रमित थपिएका छन्। संक्रमितमध्ये करिब ११ लाख ९३ हजार उपचारपछि निको भएर घर फर्किएका छन् । कोरोना भाइरसबाट संयुक्त राज्य अमेरिका सबैभन्दा बढी संक्रमित भएका छन् ।
सोमबार मात्र अमेरिकामा ११ सय १२ जनाले कोरोना संक्रमणबाट ज्यान गुमाएका छन् । योसँगै त्यहाँ कोरोनाको कारण ज्यान गुमाउनेको संख्या ६९ हजार ७ सय ९ पुगेको छ।
अमेरिकामा अहिलेसम्म १२ लाख ११ हजार ८ सय ३८ जना संक्रमित भएका छन्। सोमबार एकै दिन त्यहाँ २३ हजार ७ सय भन्दा धेरै संक्रमित थपिएका छन्।
त्यसैगरी सोमबार फ्रान्समा ३०६ जनाले कोरोना संक्रमणबाट ज्यान गुमाएका छन् भने युकेमा २८८, ब्राजिलमा ३०३, स्पेनमा १६४, इटालीमा १९५, जर्मनीमा १२७, क्यानाडामा १६०, रुसमा ७६, टर्कीमा ६४, बेल्जियममा ८०, पेरुमा ५८, इरानमा ७४, मेक्सिकोमा ९३, स्वीडेनमा ९० जनाले ज्यान गुमाएका छन्।
छिमेकी देश भारतमा गएको २४ घन्टामा कोरोना संक्रमणबाट १ सय ७५ जनाले ज्यान गुमाएका छन् । त्यहाँ अहिलेसम्म मृतकको संख्या १५ सय ६६ पुगेको छ भने संक्रमितको संख्या ४६ हजार ४ सय ३७ पुगेको छ।
भारतमा सोमबार एकै दिन ३९ सय ३२ जना नयाँ संक्रमित थपिएका छन्। त्यहाँ अहिलेसम्म १२ हजार ८ सय ४७ जना उपचारपछि निको भएका छन्। नेपालमा अहिलेसम्म ८२ जनामा संक्रमण देखिएको छ । १६ जना पूर्ण स्वस्थ भई घर फर्किएका छन ।
वि.सं.२०७७ वैशाख २३ मंगलवार ०८:१९ मा प्रकाशित
