काठमाडौं । करिब १ महिना आधा बन्द रहेको शेयर बजारमा आगामी सातादेखि कारोबार सुरु हुने भएको छ ।
विश्वभरी महामारीको रुपमा फैलिएको कोरोना भाइरसको संक्रमण नियन्त्रणका लागि सरकारले लकडाउन गरेपछि बन्द भएको शेयर बजार आगामी सातादेखि खुल्ने भएको हो ।
सरकारले लकडाउनमा केही खुकुलो नीति लिएसँगै शेयर कारोबार खुल्ने भएको धितोपत्र बोर्डका अध्यक्ष भिष्मराज ढुङगानाले बताए । “धितोपत्रको दोस्रो बजार खुल्नका लागि लकडाउन सकिने समयसम्म कुर्नु पर्दैन” उनले भने, “तर, आगामी आइतबारदेखि नै खुल्छ भन्न सकिने अवस्था पनि छैन ।” शेयर बजारमा कारोबार सहज होस् भनेर उपयुक्त प्रबन्ध गरेपछि खुलाउने उनले बताए ।
शुक्रबार पनि बजारका सम्बन्धित पक्षहरुसँग छलफल गरीने भएकाले कहिलेदेखि खुलाउने भन्ने विषयमा निर्णय भइनसकेपनि आगामी सातामा शेयर कारोबार खुलाउने गरी छलफल भइरहेको उनले बताए । लगानीकर्तालाई मेरो सेयर र कनेक्ट आपिएसमा सहभागी हुनका लागि समय दिएपछि मात्र कारोबार खुलाउने जानकारी उनले दिए ।
शेयर बजारको खुलाउँदा अझै पनि भिडभाड गर्न नहुने अवस्था भएकाले लगानीकर्ता घरबाट बाहिर निष्कने अवस्था छैन । त्यसलाई मध्यनजर गरेर आवश्यक तयारी पूरा गरेपछि शेयर कारोबार खोलिने उनको भनाइ छ ।
वि.सं.२०७७ वैशाख २६ शुक्रवार १०:४५ मा प्रकाशित
