काठमाडौं । काठमाडौं उपत्यकामा दश हजारजनाको कोरोना परीक्षण गर्ने लक्ष्यअनुसार नमुना संकलन थालिएको छ । देशभरि कोरोना संक्रमितहरूको संख्या बढ्दै गएपछि सरकारले उपत्यकामा १० हजारको कोरोना परीक्षण गर्ने लक्ष्य लिएको छ ।
उपत्यकामा राहत वितरण गर्ने स्वयंसेवक, तरकारी व्यापारी, पत्रकार र सुरक्षाकर्मीलगायतको कोरोना परीक्षण गरिनेछ । सोहीअनुसार बिहीबार कालिमाटी तरकारी बजारमा कोरोना परीक्षणका लागि नमुना संकलन गरिएको छ । कालिमाटीमा ६ सयजनाको कोरोना परीक्षण गर्न नमुना संकलन गरिएको हो ।
काठमाडौं महानगरपालिकाका– १३ का वडाध्यक्ष ध्रुवनारायण मानन्धरका अनुसार दुई सयजनाको पिसिआर परीक्षणका लागि नमुना संकलन गरिएको र चार सयजनाको आरडिटी परीक्षणका लागि नमुना संकलन गरिएको छ ।
होलसेल बजारलाई लक्षित गरी थोक बिक्रेता बढी व्यक्तिहरूको सम्पर्कमा रहनेहरूको पिसिआर र सवारीचालक तथा तरकारी ओसार्ने व्यक्तिहरूको आरडिटी परीक्षण गरिएको उनले जानकारी दिए ।
इपिडिमियोलोजी तथा रोग नियन्त्रण महाशाखाका निर्देशक डा. वासुदेव पाण्डेले जोखिममा परेका समूह निर्धारण गरी पहिलो चरणमा १० हजारको नमुना परीक्षण गर्ने बताए ।
पहिलो चरणमा विभिन्न अस्पतालमा कार्यरत चिकित्सक, सुरक्षाकर्मी, तरकारी व्यापारी र सञ्चारकर्मीहरूको परीक्षण गरिने उनले जानकारी दिए ।
बिहीबार कालिमाटी बजारसँगै टिचिङ अस्पतालमा कार्यरत चिकित्सकहरूको पनि नमुना संकलन गरिएको उनले जानकारी दिए । चार दिनभित्र १० हजारको नमुना परीक्षण गरी सक्ने तयारी सरकारले गरेको छ । पहिलो चरणको रिपोर्ट आएपछि दोस्रो चरणका कार्यक्रम सुरु हुनेछन् ।
वि.सं.२०७७ जेठ १ बिहीवार १५:०९ मा प्रकाशित