काठमाडौं । समाजसेवी पशुपति गुरुङले स्व. आमा चिसकुमारी गुरुङको मृत्यु पछि गरिने काज किरिया खर्च वापत नगद रु ५ लाख समाजसेवाका लागि प्रदान गर्नुभएको छ ।
आमाको अन्तिम संस्कार आजको परिस्थितिले गर्दा ईक्षा अनुसार गर्न नसक्दा त्यसमा लाग्ने रकम समाजसेवाका लागि प्रदान गर्नुभएको हो । गुरुङले आफ्ना मातारपिताको समाजसेवाप्रतिको भावनाको कदर गर्दै आमाको सम्झनामा नगद रु ५ लाख आइतबार आफ्नै निवासमा आमाको पुण्य तिथीको अवसर पारेर संस्कार समाज नेपाललाई प्रदान गर्नुभएको छ ।
संस्कार समाज नेपाललाई अक्षयकोष स्थापनाका लागि प्रदान गरिएको उक्त रकमबाट वार्षिक आउने व्याजको रकम समाजसेवामा खर्च गरिने छ । साथै उक्त रकमबाट सामाजिक क्षेत्रमा काम गर्ने व्यक्तिहरु मध्येबाट एक जनालाई हरेक वर्ष प्रोत्साहत स्वरुप पुरस्कार प्रदान गरिनेछ ।
संस्कार समाज नेपालका अध्यक्ष समेत रहेकी समाजसेवी गुरुङसंग यस सम्बन्धमा जिज्ञासा गर्दा आफ्नो पारिवारिक पृष्ठभूमि समाजसेवी भएको बताउनुभयो । २००७ साल अघि नै कास्कीको घान्द्रुकमा सर्वसाधरणहरुले पढ्ने विद्यालय पु¥याउनका लागि पशुपति गुरुङका हजुरवुवाले ठूलो भूमिका निर्वाह गर्नु भएको बताउनुभयो ।
हजुरवुवाले स्थापना गर्नु भएको हालको श्री मेश्रम वराह उ.मा.वि.मा आफ्ना वुवाहरुले मिलेर विपन्न परिवारका लागि रु ५ लाखको अक्षयकोष स्थापना गर्नु भएको बताउदै गुरुङले गत वर्ष आफूले पनि रु ५ लाखको अक्षयकोष स्थापना गरिदिएको बताउनुभयो ।
यसरी समाजसेवामा हजुरवुवाकै समयदेखि क्रियाशील परिवारमा हुर्किएकी गुरुङ विगत तीन वर्षदेखि सक्रिय रुपमा समाजसेवामा लागि पर्नुभएको छ ।
संस्कार समाज नेपाल मार्फत ‘आचरण सुधारौं’ महाअभियान लिएर हिड्नु भएकी गुरुङ छोटो समयमा अभियानलाई देशव्यापी बनाउन सफलसमेत हुनुहुन्छ ।
वि.सं.२०७७ जेठ १८ आइतवार १५:३९ मा प्रकाशित
