काठमाडौं । मेगा बैंक नेपाल र गण्डकी विकास बैंकले प्राप्ति सम्बन्धि प्रस्ताव पारित भएको छ । दुबै बैंकले बुधवार विशेष साधारण सभा सम्पन्न गरि प्राप्ति सम्बन्धि प्रस्तावलाई अन्तिम रुप दिएका हुन् ।
मेगाले लकडाउनका बीच बैंकको केन्द्रीय कार्यालय कमलादी, काठमाडौंमा विशेष सावधानी अपनाएर सभा सम्पन्न गरेको हो । बैंकका अध्यक्ष भोज बहादुर शाहले गण्डकीलाई प्राप्तिका लागि अन्तिम स्वीकृति गराउन लकडाउनकै बीच सफल भयौं, अव यसै आर्थिक वर्षभित्र एकीकृत कारोबारका लागि काम गर्ने बताउनुभयो ।
हालसम्म राम्रो व्यवसाय गरिरहेको गण्डकीलाई प्राप्ति गरेपछि मेगाको व्यवसाय अझ बलियो हुने विश्वाससमेत व्यक्त गर्नुभयो । मेगा बैंककी प्रमुख कार्यकारी अधिकृत अनुपमा खुञ्जेलीले पनि गण्डकीलाई प्राप्ती गरेपश्चात देशकै ठूलो वाणिज्य बैंकको रुपमा स्थापित हुने बताउनुभयो ।
उहाँले दुई बैंक एक भएपछि वाणिज्य बैंकमध्ये नाफाको आधारमा ११ औं स्थानमा, निक्षेपका आधारमा ११ औं स्थानमा र कर्जाका आधारमा १२ औं स्थानमा रहने जानकारी दिनुभयो ।
९६ ओटा शाखामार्फत सेवा दिइरहेको गण्डकी विकास बैंकलाई प्राप्ति गरेपश्चात शाखा सञ्जालमा पनि उल्लेख्य वृद्धि भई मेगा बैंकको पहुँच विस्तार हुने पनि उहाँले बताउनुभयो ।
गण्डकीलाई प्राप्ती गरेपश्चात पनि मेगा बैंकले अन्य बैंक तथा वित्तीय संस्थालाई प्राप्ती गर्ने वा मर्जरमा जाने योजना अघि सारेको छ । यसका लागि आवश्यक सम्पूर्ण काम गर्ने जिम्वेवारी सञ्चालक समितिलाई दिने निर्णयसमेत सभाले गरेको छ । मेगाले गण्डकीलाई १ बराबर १ शेयर आदानप्रदान अनुपातमा प्राप्ति गर्न लागेको हो ।
बुधबारनै गण्डकी विकास बैंकले पनि पोखरामा सभा सम्पन्न गरी मेगामा विलय हुने प्रस्तावलाई पारित गरेको छ । विसं २०७६ कात्तिक २६ गते मेगाले गण्डकीलाई प्राप्ती गर्न नेपाल राष्ट्र बैंकबाट सैद्धान्तिक सहमति प्राप्त गरेको थियो । प्राप्ति प्रक्रिया प्रयोजनका लागि गण्डकीको शेयर कारोबार भने गत असोज ९ गतेदेखिनै बन्द रहेको छ ।
हाल मेगाको चुक्तापूँजी रू. १० अर्ब ३८ करोड ८६ लाख २१ हजार छ भने गण्डकी विकास बैंकको रू. २ अबै ७५ करोड रहेको छ । दुबै बैंक एक भएपश्चात चुक्तापूँजी रू. १३ अर्ब १३ करोड ८६ लाख २१ हजार पुग्नेछ ।
व्यवसायी हिसावमा मेगाले चालू आवको तेस्रो त्रैमाससम्म रू. १ अर्ब ४५ करोड १० लाख ९० हजार खुद नाफा गरेको छ । यस अवधिसम्म मेगाको वितरणयोग्य नाफा रू. ४५ करोड ९८ लाख ४७ हजार रहेको छ ।
मेगाको प्रतिशेयर आम्दानी रू. १८ दशमलव ८३ र प्रतिशेयर नेटवर्थ रू. १३२ दशमलव १९ छ । त्यस्तै गण्डकी विकास बैंकले तेस्रो त्रैमाससम्म रू. ३६ करोड ९५ लाख ३६ हजार खुद नाफा गरेको छ । यो अवधिसम्म बैंकको वितरणयोग्य नाफा रू. ३ करोड २८ लाख ३२ हजार छ ।
प्रतिशेयर आम्दानी रू. १७ दशमलव ९२ रहेको गण्डकी विकास बैंकको प्रतिशेयर नेटवर्थ रू. १४२ दशमलव शून्य ७ रहेको छ ।
वि.सं.२०७७ जेठ २१ बुधवार १५:२८ मा प्रकाशित
