काठमाडौं । नेपाली शेयर बजार ४ असारसम्म बन्द रहने भएको छ । कोरोना भाइरसका कारण बन्द रहेको शेयर बजार थप चार दिनको लागि बन्द गर्ने निर्णय नेप्सेले गरेको छ ।
आइतबार साँझ बसेको नेपाल स्टक एक्सचेञ्जको सञ्चालक समितिको बैठकले हाललाई शेयर बजार नखोल्ने निर्णय गरेको हो । बैठकले असार ४ गते बिहीबारसम्मको लागि बजार बन्द गर्ने निर्णय गरेपनि ६ गतेसम्म बन्द हुनेछ । असार ५ गते शुक्रबार र ६ गते शनिबार भएकाले सो दिनसम्म बजार बन्द हुने भएको हो ।
असार ७ गते आइतबरदेखि भने बजार खुलाउने पक्षमा बोर्ड र नेप्से देखिन्छ । सरकारले लकडाउन थप गरेसँगै शेयर बजार पनि जेठ ३२ सम्मका लागि बन्द भएको थियो ।
सरकारले लकडाउन खुकुलो बनाएपनि शेयर बजार खुलाउनको लागि मोडालिटी तयारी नभइसकेकाले बोर्डले हालको लागि बजार बन्द गर्न निर्देशन दिएको हो ।
आइतबार नेपाल धितोपत्र बोर्डमा लगानीकर्ता संगठनका पदाधिकारीसँग भएको छलफलमा लगानीकर्ताहरुले बजार खुलाउँदा केही सहुलियतको व्यवस्था गरेर मात्र बजार खुलाउन सुझाव दिएका छन् ।
गत वैशाखमा पनि केही मोडालिटी परिर्वतन गरेर बजार खुलाउँदा दुइ दिनमा सुचक करिब ५० अंकले घट्न पुगेको थियो । सो दिनको कारोबारबाट लगानीकर्ताहरुले अर्वौ सम्पति गुमाएका थिए ।
वि.सं.२०७७ असार १ सोमवार ०९:५८ मा प्रकाशित
