काठमाडौं । नेपाल टेलिकमले आफ्ना सेवाहरूमा लाग्ने विलम्ब शुल्क ७ असारसम्म मिनाहा गर्ने निर्णय गरेको छ । नेपाल टेलिकमले आज एक विज्ञप्ति प्रकाशन गरेर टेलिकमको सेवा प्रयोग गरेबापत तिर्नुपर्ने महसुलमा ८ असारबाट विलम्ब शुल्क लाग्ने बताएको छ ।
त्यसैगरी जीएसएम मोबाइल डाटा सेवा र सीडीएमए मोबाइल डाटा सेवाको आधारभूत दरमा उपलब्ध गराइएको क्रमशः ३० प्रतिशत र २७ प्रतिशत छुट पनि टेलिकमले १ असारबाटै लागू हुने गरी कटौती गरेको छ ।
नेपाल टेलिकमका प्रवक्ता राजेश जोशीका अनुसार, नेपाल टेलिकमले ग्राहकलाई भ्वाइस तथा डाटा सेवामा उपलब्ध गराउँदै आएको स्टे कनेक्टेड अफर भने कायमै राखेको छ ।
त्यसैगरी, टेलिकमले फाइबर टू द होम (एफटिटीएच) सेवाको मर्मत सम्बन्धी गुनासो व्यवस्थापनको काम पनि शुरू गरेको जोशीले बताए ।नेपाल दूरसञ्चार प्राधिकरण र नेपाल टेलिकमबीच २१ वैशाख २०७४ मा ब्रोडब्यान्ड इन्टरनेट प्रोजेक्टका लागि भएको सम्झौताअनुसार भूकम्प प्रभावित जिल्लाहरू नुवाकोट, रसुवा, काभ्रेपलाञ्चोक र सिन्धुपाल्चोकका ७६० स्थानमा टेलिकमले २ वर्षका लागि ब्रोडब्यान्ड इन्टरनेट सेवा निःशुल्क जडान तथा मर्मत सुविधा दिएकोमा प्राधिकरणको अनुरोध अनुसार ३० जेठ देखि लागू हुने गरी थप दुई महीना निःशुल्क सेवा दिन लागिएको जोशीले बताए ।
वि.सं.२०७७ असार २ मंगलवार १९:५२ मा प्रकाशित
