काठमाडौं । सत्तारुढ दल नेपाल कम्युनिस्ट पार्टी (नेकपा)को स्थायी कमिटी बैठक आज बस्दैछ । प्रत्येक ३ महिनामा बस्नुपर्ने बैठक गत पुषयता बस्न सकेको थिएन ।
प्रधानमन्त्री निवास बालुवटारमा आज बिहान ११ बजे बस्ने बैठकमा एमसीसी, कोरोनाभाइरस, सरकार र पार्टी संचालनको समीक्षा, नागरिकता विधेयक लगायतका विषय मोटामोटी छलफलका विषय बन्ने सदस्यहरुको भनाइ छ ।
यसअघि प्रधानमन्त्री तथा नेकपा अध्यक्ष केपी शर्मा ओलीले राजनीतिक दल विभाजनसम्बन्धी अध्यादेश ल्याउँदा स्थायी कमिटी बैठक बोलाउनु पर्ने चर्को माग उठेको थियो ।
तर, सत्ता समीकरण र सचिवालय नेताहरुको गुटबन्दीमा त्यति बेला नेकपा अध्यक्ष ओलीले व्यवस्थापन गर्न सकेपछि यो बैठक सारिएको थियो ।
पहिले २५ वैशाखमा र पछि ३१ वैशाखका लागि बोलाइएको स्थायी कमिटी बैठक यसै टरे । ३१ वैशाखमा नेकपाका स्थायी कमिटी सदस्य भीम रावलको सुरक्षार्थ खटिएका एक सुरक्षाकर्मीमा कोरोना संक्रमण पुष्टि भएपछि यो बैठक स्थगित भएको थियो ।
वि.सं.२०७७ असार १० बुधवार ०८:४६ मा प्रकाशित