काठमाडौं । गाडी कर्जाको सीमा वृद्धि गर्न सवारी साधन बिक्रेताहरुले राष्ट्र बैंकसँग माग गरेका छन् । नाडा अटोमोबाइल्स एशोसिएसन अफ नेपालले नेपाल राष्ट्र बैंकका गभर्नर महाप्रसाद अधिकारीसँग भेट गरी मौद्रिक नीतिमा ऋणको सीमा बढाइ दिन आग्रह गरेका हुन् ।
अहिले गाडी किन्नेले ५० प्रतिशत आफ्नो पैसा हाल्नु पर्छ अनि मात्र बाँकी ५० प्रतिशत बैंकहरुले ऋण दिन्छन् । ब्यवसायीले १० प्रतिशत बैंकले ऋण दिने ब्यवस्था गर्न माग गरेका हुन् ।
नाडाका अध्यक्ष कृष्णप्रसाद दुलालको नेतृत्वमा गएको गएको पाँच सदस्यीय प्रतिनिधि मण्डलले ऋणको सीमा बढाउँदा सवारी साधन खरिद गर्न चाहनेहरुका लागि सहजता हुने जनाएको छ ।
ऋणको सीमा बढ्दा ओरालो लागेको सवारी साधनहरुको आयातमा सुधार आउने, सरकारको राजश्व प्राप्तिमा स्वभाविक रुपले बृद्धि हुने र देशको अर्थतन्त्र पनि थप चलायमान हुने नाडाको धारणा छ ।
छलफलमा राष्ट्र बैंकले हायर पर्चेज ऋणको सम्बन्धमा कर योग्य आयको कुल मासिक आम्दानीको ५० प्रतिशत मात्र किस्ता तिर्न सकिने अवस्थामा मात्रै ऋण दिनु पर्ने बर्तमान व्यवस्था खारेज गर्नु पर्ने माग राखिएको छ ।
वि.सं.२०७७ असार १२ शुक्रवार १५:१७ मा प्रकाशित
