एजेन्सी । भारतको नेल्लोरमा पर्यटन कार्यालयमा मंगलवार एक अपांग महिलामाथि उपव्यवस्थापकले हातपात गरेको घटना भिडियोमा कैद भएको छ ।
पर्यटन अधिकारीहरूका अनुसार, पीडितको नाम उषा रानी हो । सिनियर असिस्टेन्ट रानीले उपव्यवस्थापक सी भास्करलाई प्रोटोकल मुताबिक मास्क लगाउन भनेकी थिइन् । आफूभन्दा तल्लो तहको कर्मचारीले आफूलाई आदेश दिएको भन्दै रिसको सुरमा उनले रानीमाथि आक्रमण गरेका थिए ।
भिडियोमा भास्करले महिलालाई कपाल समातेर घिसारेको र काठको लट्ठीले हिर्काएर गम्भीर घाइते बनाएको देखिन्छ । कार्यालयको सीसीटीभी क्यामरामा कैद भिडियो सामाजिक सञ्जालमा लीक भएपछि तत्कालै भाइरल भयो र भास्करको चौतर्फी निन्दा भयो ।
उषाले नेल्लोर प्रहरीमा भास्करविरुद्ध उजुरी दिएकी छन् । पर्यटन कार्यालयका प्रबन्ध निर्देशक प्रवीण कुमारले भास्करलाई तत्कालै पदबाट बर्खास्त गरे र उनीविरुद्ध अनुशासनात्मक कारवाहीका लागि छानबीन समिति गठन गरे ।
वि.सं.२०७७ असार १६ मंगलवार १६:२२ मा प्रकाशित
