काठमाडौं । स्वेडा लघुवित्तलाई प्राप्ति गर्दै असार २१ गतेदेखि मिर्मिरे लघुवित्त वित्तीय संस्थाको नामबाट एकीकृत कारोबार शुरु हुने भएको छ । मिर्मिरेले बिहीवार सूचना जारी गर्दै असार २१ गतेदेखि एकीकृत कारोबार शुरु गर्ने जानकारी दिएको हो ।
दुबै कम्पनीले प्राप्ति सम्बन्धि प्रस्ताव वैशाख १७ गतेको साधारण सभामार्फत पारित गरेका हुन् । मिर्मिरेले विशेष साधारण सभा मार्फत र स्वेडाले दोस्रो वार्षिक साधारण सभा मार्फत प्राप्ति सम्बन्धि प्रस्ताव पारित गरेका थिए ।
नेपाल राष्ट्र बैंकबाट असार ५ गते र कम्पनी रजिष्ट्रारको कार्यालयबाट असार १७ गते प्राप्तिका लागि मिर्मिरेले अन्तिम स्वीकृति पाएको हो ।
प्राप्ति पश्चात उक्त कम्पनीको केन्द्रीय कार्यालय साविककै बनेपा नगरपालिका वडा नम्बर ८, बनेपाबजार, काभ्रेपलान्चोकमा नै रहनेछ ।
हाल २५ ओटा जिल्ला कार्यक्षेत्र रहेको उक्त कम्पनीले १० ओटा जिल्ला कार्यक्षेत्र भएको स्वेडा लघुवित्तलाई प्राप्ति गरेको हो । मिर्मिरे र स्वेडाका प्रतिनिधिबीच गत पुस २७ गते प्राप्ति सम्बन्धि समझदारी पत्रमा हस्ताक्षर भएको थियो ।
यस अघि गत वर्षको वैशाख ३० गते किसान र नागबेली लघुवित्तसँग एक आपसमा मर्जरमा जाने सम्झौता गरेको मिर्मिरेले उक्त सम्झौता सफल नभएपछि स्ववेडालाई प्राप्ति गर्ने प्रक्रिया अघि बढाएको हो ।
वि.सं.२०७७ असार १८ बिहीवार १३:२८ मा प्रकाशित
