काठमाडौं । कुमारी बैंक र देवः विकास बैंकले आइतवारदेखि एकीकृत कारोबार शुरु गरेका छन् । नेपाल राष्ट्र बैंकबाट असार १० गते अन्तिम स्वीकृति पाएसँगै यी दुई बैंकले एकीकृत कारोबार शुरु गरेका हुन् ।
देवः विकास बैंकको शून्य दशमलव ८६ कित्ता शेयर बराबर कुमारीको १ कित्ता शेयर आदान प्रदान गर्ने सहमति अनुसार कुमारीले देवः विकास बैंकलाई प्राप्ति गरेको हो ।
प्राप्ति सम्वन्धि प्रस्ताव कुमारीले जेठ १९ गतेको विशेष साधारण सभामार्फत र देवः विकास बैंकले सोहि दिन सम्पन्न १३ औं वार्षिक साधारण सभामार्फत पारित गराएका थिए ।
सोहि सभाबाट देवः विकास बैंकले ८ दशमलव ५५ प्रतिशत बोनस शेयर पनि पारित गरेको छ । बोनस पश्चात देवः विकास बैंकको चुक्तापूँजी रू. ३ अर्ब ४४ करोड ८७ लाख ४२ हजार पुगेको छ ।
देवः विकास बैंकले तेस्रो त्रैमाससम्म कायम चुक्तापूँजि रू. ३ अर्ब १७ करोड ७१ लाखको आधारमा ८ दशमलव ५५ प्रतिशत बोनस शेयर दिएको हो ।
कुमारी बैंकको चुक्तापूँजी रू. ९ अर्ब ५५ करोड ४१ लाख ३० हजार रहेको छ । दुबै बैंक एक भएपछि चुक्तापूँजी रू. १३ अर्ब २८ लाख ७२ हजार पुगेको छ ।
वि.सं.२०७७ असार २८ आइतवार ११:०६ मा प्रकाशित