विक्रम सुनार, काठमाडौं । आर्थिक वर्ष २०७६/७७ देखि ०८०/८१ सम्मको औषत आर्थिक वृद्धिदर ९.६ प्रतिशत पुर्याउन ९२ खर्ब २९ अर्ब २९ करोड कुल स्थिर लगानी आवश्यक हुने देखिएको छ ।
उक्त आर्थिक बृद्धिदर हासिल गर्न आव २०७५/७६ को मुल्यको आधारमा सो बराबरको लगानी आवश्यक हुने अनुमान गरिएको हो । राष्ट्रिय योजना आयोगले सार्वजनिक गरेको पन्ध्रौँ योजनाले यस्तो अनुमान गरेको हो ।
कुल लगानीमा सार्वजनिक क्षेत्रबाट रु. ३५ खर्ब ९८ अर्ब ३२ करोड लगानी हुने अनुमान गरिएको । यसैगरि, निजी क्षेत्रबाट रु. ५१ खर्ब ३४ अर्ब ९ करोड र सहकारी क्षेत्रबाट ४ खर्ब ९६ अर्ब ८७ करोड लगानी हुने आयोगको अनुमान छ ।
आयोगकाअनुसार कुल लगानीमा निजी क्षेत्रको नै बढी हिस्सा हुने देखिएको छ । योजना अवधीभरमा निजी क्षेत्रबाट ५५.६ प्रतिशतको मात्रामा लगानी हुने अनुमान छ ।
यस्तै, सार्वजनिक क्षेत्रको ३९ प्रतिशत र सहकारीको ५.४ प्रतिशत हिस्सा हुने आयोगले जनाएको छ । अनुमानित लगानीको बिषयगत बाँडफाँट अनुसार कृषि, उत्पादन मुलुक उद्योग, विद्युत निर्माण, शिक्षा तथा स्वास्थयमा सरकारी लगानी उल्लेख्य वृद्धि हुने आयोगको अनुमान छ ।
वि.सं.२०७७ साउन ७ बुधवार १०:०५ मा प्रकाशित
