काठमाडौं । प्रहरी प्रधान कार्यालय नक्सालमा कार्यरत थप ९ जनामा कोरोना भाइरस ( कोभिड-१९) संक्रमण देखिएको छ । केन्द्रीय प्रहरी प्रवक्ता एसएसपी कुबेर कडायतले थप ९ जना संक्रमित थपिएको बताए।
उनका अनुसार आज थपिएका ९ जना संक्रमित संगै हाल सम्म नक्साल हेडक्वार्टरमा संक्रमित हुनेको संख्या ४४ पुगेको छ। उनले थपिएका संक्रमितहरूलाई बलम्बुस्थित एपिएफ अस्पतालमा भर्ना गरिएको जानकारी दिए। नयाँ थपिएका संक्रमितहरू पनि यसअघि संक्रमण पुष्टि भएका संक्रमितहरुको कन्ट्याक्ट ट्रेसिङमा परेका हुन्।
अधिकांश संक्रमितहरू चालक, प्राविधिक र मेसमा काम गर्ने बताइएको छ। हाल हेडक्वाटरमा चालक, प्राविधिक र मेसमा काम गर्नेहरु बस्ने ठाउँ खालि गरेर स्यानेटाइजर गरिएको समेत बताइएको छ। मुख्यालयमै संक्रमणको जोखिम बढेपछि थप सतर्कता अपनाइएको छ। प्रवक्ता कडायतले संक्रमितहरू बस्ने ब्यारेक र भान्सा हाल सिल गरिएको बताए।
वि.सं.२०७७ साउन १५ बिहीवार १९:४३ मा प्रकाशित