दमौली । गाउँपालिकाका प्रमुख प्रशासकीय अधिकृतलाई कोभिड १९ संक्रमण देखिएपछि आँबुखैरेनी गाउँपालिका तीन दिनका लागि बन्द गरिएको छ ।
सासू आमा बिरामी भएकाले अस्पताल भेट्न सहिद गंगालाल राष्ट्रिय हृदयरोग गएका उनी कार्यालय फर्केपछि स्वाब संकलन गरिएको थियो । फर्केलगत्तै उनमा अस्वस्थता देखिएपछि कोभिड पोजिटिभको आशंकामा स्वाब संकलन गरिएको बताइएको छ ।
उनीसँगै क्वारेन्टाइनमा रहेका आठजनाको पनि स्वाब संकलन गरेर परीक्षणका लागि पोखरास्थित जनस्वास्थ्य प्रयोगशालामा पठाइएकामा अरुको नेगेटिभ नतिजा आएको थियो ।
प्रमुख प्रशासकीयको कोरोना रिपोर्ट पोजिटिभ आएपछि गाउँपालिका र वडा कार्यालय तीन दिनका लागि बन्द गरिएको प्रवक्ता कटकबहादुर थापाले बताए । ’संक्रमण फैलन सक्ने जोखिमका कारण तीन दिन गाउँपालिका तथा वडा कार्यालयका सबै सेवा बन्द गरिएको छ,’विज्ञप्तिमा उल्लेख छ ।
कर्मचारी र जनप्रतिनिधिसहित दुई दर्जनको स्वाब संकलन कार्यालयका प्रमुखमा संक्रमण देखिएकाले उनको सम्पर्कमा आएका गाउँपालिकाका कर्मचारी र जनप्रतिनिधिको पहिचान गरी स्वाब संकलन थालिएको छ ।’२७ जनाको स्वाब संकलन गरेर पठाउने तयारी गरिएको छ,’ सूचना अधिकारी सिखरलाल डोटेलले भने।
गाउँपालिकाले कार्यालय बन्द गर्ने सूचना जारी गरेपछि कार्यालय बन्द भएपनि बजार भने खुलेका छन् ।
वि.सं.२०७७ साउन १८ आइतवार ११:४१ मा प्रकाशित
