जनकपुर । पछिल्लो समय समुदाय कोरोना संक्रमण तीव्ररुपमा फैलिएपछि सर्लाहीमा पनि निषेधाज्ञा घोषणा गरिएको छ । प्रमुख जिल्ला अधिकारी सुरेन्द्र पौडेलले बुधबार बिहान छ बजेदेखि लागु हुनेगरी साउन २७ गते राति १२ बजेसम्मको लागि जिल्लाभर निषेधाज्ञा जारी गरेको बताए ।
स्थानीय प्रशासन ऐन, २०२८ को दफा ६(३) बमोजिम सर्लाही जिल्लाभर लागु हुनेगरी जिल्ला प्रशासन कार्यालय, सर्लाहीले चार बुँदे आदेश जारी गरेको छ । कोरोना भाइरसको सम्भावित संक्रमण रोकथाम तथा जनस्वास्थ्यलाई खराब असर पर्ने सम्भावनालाई दृष्टिगत गरी जिल्ला सुरक्षा समिति, कोरोना संकट व्यवस्थापन केन्द्र र जिल्ला विपद् व्यवस्थापन समितिको संयुक्त बैठकबाट यो निर्णय गरिएको प्रजिअ पौडेलले बताए ।
औषधोपचार, खाद्यान्न वस्तु खरिद र पेट्रोलियम पदार्थ खरिद जस्ता अतिआवश्यक काममा बाहेक कुनै पनि व्यक्तिलाई घरबाहिर ननिस्कन सार्वजनिक सूचना मार्फत निर्देशन दिइएको छ । त्यस्तै, एम्बुलेन्स, बिरामी बोकेको गाडी, दमकल, दूध तथा खाद्यान्न ढुवानी गर्ने सवारी साधन, स्वास्थ्यकर्मी, सुरक्षाकर्मी र सञ्चारकर्मीले प्रयोग गर्ने बाहेक मोटरसाइकलसमेत कुनै सवारी साधन सडकमा ननिकाल्न र बिना कुनै काम पैदल समेत सडकमा नहिँड्न निर्देशन जारी गरिएको छ ।
‘अतिआवश्यक उपभोग्य सामग्री बिक्री गर्ने स्थायी प्रकृतिका पसल, इन्धन पसल, डिपो र औषधी पसल बाहेक दैनिक वा साप्ताहिक हाटबजार, मेला नलगाउने । आर्थिक, राजनैतिक, सामाजिक, आर्थिक र अन्य कुनै पनि रुपमा भेला, आमसभा, सभा, सम्मेलन भोजभतेर जस्ता समूहमा भेला हुने कार्य नगर्ने, नगराउने’ प्रजिअ पौडेलले जारी गरेको सूचनामा उल्लेख छ ।
यसअघि प्रदेश २ को राजधानी जनकपुरधाम उपमहानगरपालिका र टाँसिएरै रहेको क्षिरेश्वरनाथ नगरपालिका, पर्साको वीरगंज महानगरपालिका तथा सप्तरीको राजविराज नगरपालिकामा जारी गरिएको निषेधाज्ञा निरन्तर कायमै छ ।
वि.सं.२०७७ साउन २० मंगलवार १७:५६ मा प्रकाशित
