चितवन । विशेष गरी दाहासंस्कार र दर्शन गर्ने मलामी र दर्शनार्थीको भीड बढ्दै गएपछि देवघाट क्षेत्रका दुई साताको लागि होटल तथा यातायात बन्द गरिएको छ ।
पछिल्लो समय दाहासंस्कारको लागि अनियन्त्रित संख्यामा मलामी आएको र देवघाट दर्शनको लागि भक्तजनको भीड बढ्दै गएको भन्दै आजबाट भाद्र ७ गते सम्मका लागि बन्द गर्ने निर्णय गरेको हो ।
देवघाट क्षेत्र बिकास समिति आज (आइतबार) एक बिज्ञप्ती जारी गरि चितवनमा कोरोना संक्रमण बढिरहेकोले अनियन्त्रित संख्यामा मलामी आउँदा देवघाटमा जोखिम बढेको बताएका्े छ । मलामीहरु अन्तिम संस्कारका लागि आउने र अनावश्यक घुमफिर गर्ने भएकोले जोखिम बढेको समितिको ठहर छ ।
यस्तै होटल व्यवसाय खुल्दा र त्यहाँ जम्मा हुने समुह, अनावश्यक हिडडुल गर्ने समुह, भक्तजनहरु र अन्य देशबाट आएर लुकिछिपी परिवारसँग बस्ने नागरिकहरुका कारण पनि संक्रमणको जोखिम बढेको विज्ञप्तीमा उल्लेख छ
सम्भावित जोखिमलाई मध्यनजर गर्दै समितिले ठुलो संख्यामा मलामी नआउन आग्रह गरेको छ । आज (आइतबार) बसेको सर्वपक्षीय बैठकले अधिकतम २० देखि २५ जनाको संख्यामा मात्र मलामी आउन आग्रह गरेको समितिका अध्यक्ष शिवराज पौडेलले जानकारी दिए ।
यस्तै मलामीहरुलाई अनावश्यक घुमफिर नगर्न तथा स्नान गरी सिधै घर फर्किन पनि आग्रह गरिएको छ । सर्वपक्षीय बैठकले चितवन र तनहुँ तर्फका होटलहरु भाद्र ७ गतेसम्म बन्द गर्ने निर्णय गरेको छ ।
अत्यावश्यक सेवा प्रदान गर्ने पसलहरु बिहान ७ बजेदेखि १० बजेसम्म र अपरान्ह ४ बजेदेखि साँझ ७ बजेसम्म निश्चित सुरक्षा मापदण्ड अपनाएर मात्र खोल्न, अनावश्यक रुपमा हिडडुल नगर्न, हिंड्नै परे अनिवार्य मास्क प्रयोग गर्न, भाद्र ७ गतेसम्म स्थानीय रुटमा चल्ने सार्वजनिक सवारी साधनहरु देवघाट(आँपटारी(नारायणगढ आवत जावत बन्द गर्न निर्देशन दिएको हो । तर, अत्यावश्यक सवारी साधनको हकमा यो नियम लागु हुने छैन ।
वि.सं.२०७७ साउन २५ आइतवार २०:५४ मा प्रकाशित
