बागमती । चिनको तिब्बत सरकारबाट वाग्मती प्रदेश सरकारलाई प्राप्त स्वास्थ्य उपकरणहरु प्रदेशका विभिन्न अस्पतालहरुलाई वितरण गरिने भएको छ ।
प्राप्त उपकरणहरु प्रदेशका ५ वटा अस्पतालहरुलाई वितरण गरिने योजना रहेको प्रदेशको सामाजिक विकास मन्त्रालयले जानकारी दिएको छ । जसमध्ये विभिन्न प्रकारका ७५ थान उपकरणहरु मदन भण्डारी स्वास्थ्य विज्ञान प्रतिष्ठान अन्तर्गतको हेटौंडा अस्पताललाई , ४२ थान भक्तपुर अस्पताललाई, ३५ थान धादिङ अस्पताललाई, ३१ थान नुवाकोटको त्रिशुली अस्पताललाई र २७ थान सिन्धुली अस्पताललाई वितरण गर्न लागिएको जनाइएको छ ।
प्रदेश सरकारले ४ थान प्यासेन्ट मोनिटर भने गण्डकी प्रदेश सरकारलाई वितरण गर्ने जनाइएको छ । १५ थान विभिन्न प्रकारका उपकरणहरु तथा पिपिई , मास्क, डिस्पोजेबल नाईट ट्रायल इक्जाम ग्लोबस्, डिस्पोजेबल गोफेन्ट क्याप , मेडिकल आइसोलेन बुट, सु कभरहरु भने आवश्यकता अनुसार वितरण गर्नेगरी राखिने जनाइएको छ ।
मुख्यमन्त्री डोरमणि पौडेलको सचिवालयको पहलमा तिब्बत सरकारले रु १३ करोड बराबरको स्वास्थ्य सामाग्रीहरु केहीदिन अघि वाग्मती प्रदेशलाई सहयोग गरेको थियो ।
प्रदेश सरकारलाई भेन्टीलेटर १६ थान, कन्सेन्ट्रेटर १५ थान, सिरिन्ज पम्प १० थान, इन्फ्युजन पम्प १० थान, ईलेक्ट्रो कार्डियोग्राफ ३ थान, प्यासेन्ट मोनिटर ६० थान, कलर डप्लर अलट्रासाउण्ड डायग्नोष्टिक सिस्टम १० थान, एनेस्थेटिक लारिङगोस्कोप १० थान, अक्सीजन रिजर्ब भोयर ब्याग ५० थान, ब्लड ग्याँस एनलाईजर १० थान, डेफिग्रीलेटर मोबाईल १० थान, अक्सीमिटर पल्स २० थान, आईसियु बेड ५० थान, पिपिई १ हजार थान, एन ९५ मास्क २ हजार थान, डिस्पोजेबल नाईट ट्रायल इक्जाम ग्लोबस् २ हजार थान, डिस्पोजेबल गोफेन्ट क्याप २ हजार थान, मेडिकल आइसोलेन बुट, सु कभर २ हजार थान सहयोग प्राप्त भएको मुख्यमन्त्रीका प्रमुख स्वकीय सचिव अनुप पौडेलले जानकारी दिनुभयो । –रिपेश दाहाल
वि.सं.२०७७ साउन २९ बिहीवार १८:२१ मा प्रकाशित