बैतडी । कोरोनाको संक्रमण बढ्दै गएको भन्दै बैतडीमा बिहीबारदेखि लकडाउन गरिने भएको छ । सदरमुकामस्थित दशरथचन्द नगरपालिकाले संक्रमण बढ्दै गएको भन्दै बिहीबारदेखि भदौ १५ गते लकडाउन गर्ने निर्णय गरेको हो।
लकडाउनको उक्त अवधिका अत्यावश्यक बाहेकका सबै सेवा बन्द गर्ने निर्णय गरेको नगरप्रमुख नरेन्द्रसिंह थापाले जानकारी दिए। जोखिम बढ्दै गएकाले अत्यावश्यकबाहेक सेवा बन्द गर्ने निर्णय गरेको हो।
लकडाउनमा औषधि पसल, एम्बुलेन्स र अत्यावश्यक सवारी साधन मात्रै नगर क्षेत्रभित्र सञ्चालन गर्न दिने निर्णय भएको छ। यस्तै नगर क्षेत्रभित्रका बैंकहरुलाई आइतबार, मंगलबार र बिहीबार हप्ताको तीन दिन मात्रै खुल्ला राख्ने निर्णय भएको छ ।
यसैगरी गौरा पर्वलाई मध्यनजर गरी दैनिक उपभोग्य सामग्रीका पसल, सिलाई पसल र कपडा पसलहरुल बिहान ७ देखि १० बजे सम्म र साँझ ४ बजेदेखि ६ बजे सम्म मात्रै खुला राख्ने निर्णय गरिएको छ।
यस्तै धार्मिक स्थलहरुमा नित्य पूजा बाहेक भीडभाड हुने खालका सबै जात्रा,मेला स्थगित गरिएका छन् भने चाडपर्वहरू आफ्नै घरभित्रै मनाउन आग्रह गरिएको छ ।
नगर क्षेत्रभित्र सबै प्रकारका भेला, गोष्ठी, तालिम, बैठक र सेमिनारहरुमा रोक लगाइएको नगरपालिकाले प्रकाशित गरेको सूचनामा उल्लेख गरिएको छ।
वि.सं.२०७७ भदौ ३ बुधवार १८:३७ मा प्रकाशित