एजेन्सी । बेलायती कम्पनीमा कर्मचारी कटौती बढेको छ । कोरोना भाइरसको महमारीका कारण उत्पन्न हानिकारक आर्थिक प्रभावका कारण योजनाबद्ध रोजगारी कटौती बढेको हो ।
बीबीसीले प्राप्त गरेको तथ्यांकअनुसार गत वर्षको सोही अवधिको तुलनामा जुनमा बेलायती कम्पनीहरुको योजनाबद्ध कर्मचारी कटौती पाँच गुणाले बढेको छ ।
जुनमा बेलायतका १ हजार ७७८ कम्पनीहरुले कुल १ लाख ३९ हजार कर्मचारीलाई कामबाट निकाल्ने योजनाबारे सरकारलाई जानकारी गराएका थिए । गत वर्षको जुनमा भने यस्तो जानकारी गराउने कम्पनीको संख्या ३४५ थियो भने यिनीहरुले कुल २४ हजार कर्मचारी कटौतीको घोषणा गरेका थिए ।
बेलायतमा २० वा सो भन्दा धेरै संख्यामा कर्मचारीलाई कामबाट निकाल्ने योजना भए कम्पनीहरुले इन्सल्भेन्सी सर्भिसलाई जानकारी गराउनु पर्छ ।
महामारीको अवधिमा कम्पनीहरुबाट तलब नपाएका करीब १ करोड कर्मचारीको तलब सरकारले भुक्तानी गरिहेको छ । अक्टोबरमा यो कार्यक्रम सकिएपछि बेरोजगारी दर झनै बढ्ने अर्थशास्त्रीहरुको प्रक्षेपण छ ।
यस वर्षको पहिलो अर्धवार्षिक अवधिमा बेलायतको अर्थतन्त्र २० प्रतिशतभन्दा धेरैले खुम्चिएको थियो । हालैका दिनका अर्थतन्त्रमा सुधारका केही संकेत देखिएको भएपनि सन् २०२० को अन्त्यमा अर्थतन्त्र ९ दशमलव ५ प्रतिशत सानो हुने केन्द्रीय बैंक ‘बैंक अफ इंगल्याण्ड’ले बताएको छ ।
वि.सं.२०७७ भदौ ४ बिहीवार १३:४५ मा प्रकाशित
