काठमाडौं । निषेधाज्ञाको समयमा बजारमा अत्यावश्यक पसल नखुल्दा उपभोक्तालाई समस्या परेको छ ।
निषेधाज्ञाको समयमा अत्यावश्यकीय सेवाका पसल खुल्न दिने भनिए पनि प्रहरीले भित्री क्षेत्रमा समेत बिहान सात बजे देखिनै दैनिक उपभोग्य वस्तुका पसल जवर्जस्ती बन्द गराइरहेको पाइएको छ ।
प्रहरीले बिक्रेता र उपभोक्ता दुवैलाई दुव्र्यवहार गर्दै ज्यादतीपूर्ण ढंगले पसल बन्द गराइरहेको काठमाडौं कोटेश्वरस्थित एक पसल सञ्चालक बताउँछन् । उनका अनुसार प्रहरीले बिहान सात बजेदेखि नै पसल बन्द गराउन थालेपछि बिहानै उपभोक्ताको भीड जम्मा भएर जोखिम झनै बढेको छ ।
कोटेश्वरका स्थानीय तथा डेरावाल उपभोक्ता मञ्च काठमाडौंका अध्यक्ष भुवन थापा निषेधाज्ञाका नाउँमा प्रहरी ज्यादती बढेको बताउँछन् । उनका अनुसार प्रहरीले बिनाआधार कहिले बिहान सात बजेसम्म त कहिले नौ बजेसम्म पसल खुल्न दिने गरेको र त्यसबारे प्रश्न गर्दा धम्क्याउने गरेको छ । “प्रशासनको निर्णय एउटा छ, प्रहरीको रवैया अर्कै छ,” थापा भन्छन्, “किनमेलका लागि सीमित समयमात्र दिने गर्दा संक्रमणको जोखिम झनै बढेको छ, प्रहरीले यति सामान्य कुरा पनि नबुझेर ‘दादागिरी’मा उत्रेको छ ।”
दैनिक उपभोग्य वस्तुको पसल बन्द गर्ने प्रशासनको आदेश नभए पनि पूर्ण रूपमा बजार खुल्न नसक्दा उपभोक्ताले समस्या भोग्नुपरेको छ । कारोबार दैनिकमा समाचार छ ।
वि.सं.२०७७ भदौ ७ आइतवार ०९:१७ मा प्रकाशित