काठमाडौँ । नेपालमा थप ८५५ जनामा कोरोना संक्रमण देखिएको छ । योसंगै अहिलेसम्म नेपालमा कोरोना संक्रमितको संख्या ३३ हजार ५३३ जना पुगेको छ ।
स्वास्थ्य तथा जनसंख्या मन्त्रालयले गरेको नियमति पत्रकार सम्मेलनमा प्रवक्ता डा. जागेश्वर गौतमले विगत २४ घण्टामा विभिन्न प्रयोगशालामा ११ हजार ३२७ परीक्षण गरिएकोमा ८५५ जनामा सङ्क्रमण देखिएको जानकारी गराउनुभयो ।
यसैगरी आज ३१३ जना सङ्क्रमण मुक्त भई घर फर्किएका छन् । अहिलेसम्म १९ हजार ११९ जना सङ्क्रमण जितेर घर फर्किसकेका छन् । निको हुने दर ५७ प्रतिशत रहेको छ ।
यस्तै पछिल्लो २४ घण्टामा काठमाडौ उपत्यकामा २३२ जनामा सङ्क्रमण भएको छ । मन्त्रालयका प्रवक्ता डा. गौतमका अनुसार काठमाडौमा १९९, ललितपुरमा १९ र भक्तपुरमा १४ जना नयाँ सङ्क्रमित भेटिएका हुन् ।
यस्तै दुई जिल्ला मुस्ताङ र हुम्ला सङ्क्रमण मुक्त भएका छन् । यस्तै सक्रिय सङक्रमित १४ हजार २५० रहेका छन् भने १० हजार ४५३ क्वारेन्टिनमा रहेका छन् ।
वि.सं.२०७७ भदौ ९ मंगलवार १६:२७ मा प्रकाशित