काठमाडौं । कोरोना भाइरस संक्रमण फैलिँदै जादा सरकारले यसको नियन्त्रणको लागि स्वयंसेवक रुपमा सेवा दिन आह्वान गरेको छ ।
स्वास्थ्य तथा जनसंख्या मन्त्रालयले स्वयंसेवकको रुपमा कोरोना संक्रमितको उपचार गर्न चाहने स्वास्थ्यकर्मीहरूका लागि आवेदन माग गरेको हो । मन्त्रालयले अस्पताल तथा अन्य स्वास्थ्य संस्थाहरुको आइसोलेसन तथा क्वारेन्टिनमा रहेका बिरामीहरुलाई स्वयंसेवकको रुपमा स्वास्थ्य सेवा उपलव्ध गराउन भनेको छ ।
मन्त्रालयले चिकित्सक, नर्स प्यारामेडिक्स, तथा अन्य स्वास्थ्यकर्मी तथा सेवा निवृत्त स्वास्थ्यकर्मीहरुले स्वयंसेवकको रुपमा काम गर्न इच्छुकले तीन दिन भित्र आवेदन दिन सक्ने बताएको छ। आवेदन अनलाइनबाट दिन सकिने छ ।
पछिल्लो समय देशमा संक्रमितको संख्या बढ्दै जाँदा सरकारले करार सेवा तथा स्वयंसेवकको रुपमा जनशक्ति आव्हान गर्न थालेको छ ।
सरकारी निजी तथा सामुदायिक सहित अन्य संघ संस्थाका भवनमा आइसोलेसन तथा क्वारेन्टिनको व्यवस्था गरिएको छ । अहिले ती आइसोलेसन तथा क्वारेन्टिनमा काम गर्न स्वयंसेवकको आवेदन माग गरिएको हो।
वि.सं.२०७७ भदौ १६ मंगलवार १८:३५ मा प्रकाशित
