काठमाडौं । अमेरिकी डलर निरन्तर कमजोर हुँदै गएको छ । नेपाल राष्ट्र बैंकले बुधबार १ डलर बराबर ११६ रुपैयाँ ८९ पैसा बिक्रीदर तोकेको छ । एक सातायता डलरको भाउ घट्दै गएकोछ । डलर बलियो भएर १२० रुपैयाँ हाराहारी रहेको थियो ।
भारतीय रिजर्व बैंक (आरबीआई) ले १ डलर बराबर ७३.५९ भारु तोकेको छ । भारुसंग नेपाली रुपैयाँको स्थीर विनियमदर भएकाले भारतमा घटेपछि यसको असर नेपालमा पर्ने गरेको छ ।
छिल्लो समय चीनको अर्थतन्त्र विस्तारै रिभाईभ भइरहेको छ । यसले डलरलाई कमजोर बनाएको बताइएको छ । चिनियाँ अर्थतन्त्र तंग्रिँदै जानु नै डलर कमजोर हुनु हो ।
डलरको मूल्य घट्दा नेपाललाई ठूलो फाइदा पुग्छ । किनभने, नेपालले भोलि ठूलो परिमाणमा आयात गर्नुपर्ने हुन्छ । आर्थिक क्रियाकलाप विस्तार गर्नुपर्छ । आर्थिक क्रियाकलाप विस्तारमा यसले मार्ग प्रसस्त गर्छ । आयातित वस्तुको मूल्य सस्तो बनाउने काम गर्छ ।
नेपालले लिएको बैदेशिक ऋणको ठूलो ब्ययभार बढ्दै गइरहेको अवस्थामा डलरको मूल्य ओरालो लाग्दा त्यसले दायित्व कम गराउँ छ ।
नेपालका उद्योगहरुले बाहिरबाट कच्चा पदार्थ ल्याएर यहाँ तयारी वस्तु बनाउने गर्छन । त्यसमा पनि डलरको मूल्य ओरालो लाग्दा फाइदा हुन्छ ।
डलर कमजोरले रेमिट्यान्स आप्रवाहमा केही असर गर्न सक्छ । किनभने, १२०÷१२१ रुपैयाँ हुँदा जुन गतिमा रेमिट्यान्स आइरहेको थियो । त्यसमा केही असर पर्न सक्छ ।
कामदारहरुले पछि डलरको मूल्य बढ्ने आशमा उतै पैसा होल्ड गर्न सक्छन् । यदि सामान्य अवस्था भएको भए यसले रेमिट्यान्स भित्रिन केही असर गर्न सक्छ ।
वि.सं.२०७७ भदौ १७ बुधवार ११:५८ मा प्रकाशित