काठमाडौं । पछिल्लो समय सहकारीहरुमा रकम जम्मा हुने क्रम बढेको छ । बैकहरुले बचतमा ज्यादै न्यून ब्याजदर दिन थालेपछि सहकारीमा निक्षेप बढ्न थालेको हो ।
राष्ट्रिय सहकारी बैकमा साउनयता निक्षेप संकलनमा वृद्धि भएको छ । साउन र भदौमा ७ अर्बभन्दा बढी निक्षेप सहकारी बैकमा जम्मा भएको छ ।
यता नेपाल बचत तथा ऋण केन्द्रीय सघ (नेफ्स्कुन) मा भदौ यता तीन अर्ब रुपैयाँ झिकिएको छ भने २ अर्ब ७५ करोड रुपैयाँ बचत आएको नेफ्स्कुनका कायम मुकायम प्रमुख कार्यकारी अधिकृत प्रकाशप्रसाद पोखरेले बताउनुभयो ।
भदौ १० गते मात्र सहकारी बैकले नयँ ब्याजदर सार्वजनिक गरेको छ । बैकले बचतमा २ दशमलव २५ प्रतिशतदेखि ७ प्रतिशतसम्म र कर्जाको ब्याजदरमा साढे ६ देखि साढे १० प्रतिशतसम्म लिने गरी नयाँ ब्याजदर सार्वजनिक गरेको छ ।
मुलुकभर सञ्चालित साढे ३४ हजार सहकारी संस्थामध्ये सबैभन्दा बढी १३ हजार ५ सय ७८ वटा बचत तथा ऋण सहकारी संस्था छन् । यो कूल सहकारी संस्थाको ३९ दशमलव ३४ प्रतिशत हो ।
वि.सं.२०७७ भदौ १८ बिहीवार १८:३३ मा प्रकाशित