नयाँ दिल्ली । भारतमा डिजेलको मूल्य करीब ६ महीनामा पहिलो पटक घटेको छ । बिहीवार त्यहाँको सरकारी तेल कम्पनीहरुले डिजेलको खुद्रा मूल्य प्रतिलिटर १६ पैसा घटाएर ७३ रुपया ४० पैसा कायम गरेका छन् ।
बुधवार राजधानी दिल्लीमा प्रतिलिटर डिजेलका लागि उपभोक्ताहरुले ७३ रुपया ५६ पैसा तिर्नु पर्थ्यो । पेट्रोलको भाउ भने प्रतिलिटर ८२ रुपया ८ पैसामा यथावत् रहेको छ । डिजेलको भाउमा गरिएको यो मध्यमार्च यताको पहिलो कटौती हो ।
त्यति बेला भने सरकारी तेल कम्पनीहरुले ८२ दिनसम्म पेट्रोलियम पदार्थको भाउमा मूल्य संसोधन गरेका थिएनन् । जुन ७ देखि जुलाई २५ बीचको अवधिमा डिजेलको भाउ प्रतिलिटर १२ रुपया ५५ पैसा बढेको थियो ।
वि.सं.२०७७ भदौ १८ बिहीवार १९:५९ मा प्रकाशित
