एजेन्सी । बेलायती हवाई सेवा प्रदायक कम्पनी भर्जिन एट्लान्टिकले थप १ हजारभन्दा धेरै कर्मचारीलाई कामबाट निकाल्ने भएको छ ।
कोरोना भाइरसको महामारीको चपेटाबाट कम्पनीलाई बचाउनका लागि कटौतीको योजना अन्तर्गत थप १ हजार १५० जना कर्मचारीलाई कामबाट निकाल्न थालिएको हो ।
यसअघि पनि वर्षको शुरुमै भर्जिन एट्लान्टिकले १० हजारमध्ये बाट ३ हजार ५०० कर्मचारीलाई कामबाट निकालिसकेको छ । हवाई यात्रामा सामान्य स्तरमा नफर्किएसम्म कम्पनीलाई बचाइराख्न थप लागत कटौती गर्नु परेको बताइएको छ ।
अमेरिका र बेलायतबीचको हवाई यात्रा अनिश्चित रहेसँगै कम्पनीको व्यवसाय अनिश्चित बनेको छ । कम्पनीले मुख्यतः आन्ध्र महासागर आरपार उडान गर्दै आएको छ ।
गएको ६ महीना कम्पनीको इतिहासमै सबैभन्दा चुनौतीपूर्ण रहेको र यस संकटको अवस्थाबाट पार लगाउन व्यापक स्तरमा परिवर्तन गर्नु पर्ने समेत कम्पनीको भनाइ छ । रोजगारी कटौतीका लागि भर्जिन एट्लान्टिकले शुक्रवारदेखि शुरु हुने गरी कर्मचारी संगठनसँग ४५ दिने परामर्श अवधि थपेको छ ।
वि.सं.२०७७ भदौ २१ आइतवार ०८:३५ मा प्रकाशित