एजेन्सी । अर्जेन्टिनाको एक विश्वविद्यालयकी प्राध्यापकले जूममा अन्लाइन क्लास लिँदै गर्दा सास फेर्न गाह्रो भएपछि देहत्याग गरेकी छन् । उनलाई कोरोनाको आशंका गरिएको छ ।
पाओला दे सिमोनले राजधानी ब्युनस आयर्सको युनिभर्सिदाद अर्जेन्टिना दे ला इम्प्रेसामा राजनीति र अन्तर्राष्ट्रिय सम्बन्ध पढाउने गरेकी थिइन् । जूममा लेक्चर दिँदै गर्दा बुधवार उनको मृत्यु भयो ।
मंगलवार पढाउँदै गर्दा पनि उनलाई सास फेर्न गाह्रो परेको स्थानीय सञ्चारमाध्यमले लेखेका थिए । उनको स्वास्थ्य खराब देखेपछि विद्यार्थीहरूले उनलाई एम्बुलेन्स पठाउनका लागि ठेगाना खुलाउन भनेका थिए ।
डी सिमोनले अगस्ट महिनाको अन्त्यतिर कम्तीमा चार हप्तादेखि कोभिडको लक्षण देखिएको भनी ट्विटरमा लेखेकी थिइन् । उनका चिकित्सक पति पनि निकै गलेको उनले बताएकी थिइन् ।
लगातार खोकी लागिरहेको भए पनि उनले काम गरिरहेको भनी विश्वविद्यालयका एक संयोजकले बयान जारी गरेर बताए । उनको मृत्युमा विश्वविद्यालयले शोक सन्देश जारी गरेको छ ।
वि.सं.२०७७ भदौ २१ आइतवार १६:३२ मा प्रकाशित