काठमाडौं । सरकारले असोज १ गतेदेखि हिमाली तथा पहाडी जिल्लामा आन्तरिक उडान खोल्ने तयारी गरेको छ । कोरोना संक्रमण कम देखिएका केही जिल्लाबाट उडान शुरू गर्नेगरी तयारी भइरहेको संस्कृति, पर्यटन तथा नागरिक उड्डयनमन्त्री योगेश भट्टराईले बताउनुभएको छ ।
यसअघि भदौ १६ गतेदेखि नै आन्तरिक उडान खोल्ने भनिए पनि काठमाडौं लगायत विभिन्न जिल्लामा कोरोना संक्रमण बढेपछि सरकारले अर्को निर्णय नहुन्जेल आन्तरिक उडान बन्द गर्ने निर्णय गरेको थियो ।
मन्त्री भट्टराईले ५ महिनादेखि ठप्प पर्यटन क्षेत्रलाई कोरोना महामारीकै बीचमा सुरक्षित ढंगले सुचारु गर्नेबारे शनिवार पर्यटन क्षेत्रका सरोकारवालाहरूको छलफलमा असोज १ देखि सीमित जिल्लामा उडान शुरू गर्ने तयारी भएको बताउनुभएको हो ।
अन्तरराष्ट्रिय उडानको केही दिनको अभ्यास हेरेर उडान संख्या बढाउने तयारी पनि गरिएको उनको भनाइ छ । सरकारले अन्तरराष्ट्रिय उडान भदौ १६ देखि नियन्त्रित रूपमा खोलेको छ ।
वि.सं.२०७७ भदौ २२ सोमवार ०७:३८ मा प्रकाशित
