काठमाडौँ । पछिल्लो २४ घण्टामा नेपालमा थप १४५४ जनामा कोरोना संक्रमण पुष्टि भएको छ । योसँगै नेपालमा कोरोना भाइरसबाट सङ्क्रमितको सङ्ख्या ५१ हजार ९१९ पुगेको छ ।
देशका विभिन्न प्रयोगशालामा विगत २४ घण्टामा १० हजार ७०१ जनाको पिसिआर परीक्षण गरिएको स्वास्थ्य तथा जनसंख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले जानकारी दिए ।
पछिल्लो २४ घण्टामा कोरोना मुक्त भई ९७२ जना ‘डिस्चार्ज’ भएका छन् । हालसम्म कुल ३६ हजार ६७२ जना निको भएर घर फर्केका मन्त्रालयले जनाएको छ । हाल देशभर १४ हजार ९२५ सक्रिय सङ्क्रमित छन् भने क्वारेन्टिनमा ६ हजार ७८ जना छन् ।
त्यसैगरी कोरोना संक्रमणबाट विगत २४ घण्टामा थप ५ जनाको मृत्यु मन्त्रालयले जनाएको छ । हालसम्म सङ्क्रमणबाट मृत्यु हुनेको सङ्ख्या ३२२ जना पुगेको छ ।
काठमाडौं उपत्यकामा थप ६ सय ९६ जनामा संक्रमण
यसैविच काठमाडौं उपत्यकाका तीन जिल्लामा शुक्रबार थप ६ सय ९६ जनामा कोरोना संक्रमण देखिएको छ । संक्रमण देखिएकोमा काठमाडौं जिल्लाका ६ सय २० जना, ललितपुरका ३८ जना र भक्तपुरका ३८ जना रहेको स्वास्थ्य तथा जनसंख्या मन्त्रालयले जनाएको छ ।
जनघनत्व बढी भएको उपत्यकामा केही दिनयता संक्रमितको संख्या बढ्दै गएको छ । आज देशभर १४ सय ५४ जनामा संक्रमण पुष्टि भएको छ ।
वि.सं.२०७७ भदौ २६ शुक्रवार १६:५८ मा प्रकाशित
