वासिङटन । विश्वकै ठूलो ई–कमर्स कम्पनी अमेजोनका झण्डै २० हजार कर्मचारीलाई कोरोनाभाइरस संक्रमण भएको बताइएको छ ।
अमेजोनले यही बिहीबार आफ्ना १९ हजार ८ सय भन्दा धेरै कर्मचारी संक्रमित भएको जानकारी दिएको हो । अमेरिकी कम्पनी अमेजोनले अनपेक्षित रुपमा संक्रमण फैलिएको पनि जनाएको छ ।
अमेजोनले ६ सय ५० स्थानमा हरेक दिन ५० हजारको कोरोना परीक्षण गरेको छ । अमेरिकाको सिएटलमा मुख्य कार्यालय रहेको यस कम्पनीसँग लाखौँ कामदार आवद्ध छन् । ‘यो संकट सुरु भएदेखि नै हामीले हाम्रा कर्मचारीलाई सूचना दिन र सचेत गराउन कठिन मेहनत गरेका छौँ,’ अमेजोनले आफ्नो ब्लग पोस्टमार्फत यस्तो बताएको छ ।
साथै कर्मचारीहरुमा संक्रमण फैलने क्रम अझै बढ्नसक्ने भन्दै कम्पनीले सबैलाई सचेत पनि गराएको छ । अमेरिकामा गत मार्चदेखि नै कोरोनाभाइरसका संक्रमित देखिन थालेका थिए ।
वि.सं.२०७७ असोज १६ शुक्रवार १४:०९ मा प्रकाशित
