काठमाडौं । कर्मचारीहरुलाई कोरोना संक्रमण देखिएपछि उपत्यकाका २ वटा यातायात कार्यालय बन्द भएका छन्।
गत मंगलबार ३ जना कर्मचारीलाई कोरोना संक्रमण देखिएपछि कार्यालय बन्द गर्नुपरेको यातायात व्यवस्था सेवा कार्यालय ठूलो भर्याङका कार्यालय प्रमुख राजकुमार कपालीले जानकारी दिए।
‘पहिले कार्यालयमा भएको बैंकका २ जनालाई संक्रमण देखियो। त्यसपछि हामीले कर्मचारीहरुको पिसिआर गराउँदा ३ जनाको रिपोर्ट पोजेटिभ आयो,’ उनले भने।
त्यस्तै गत शुक्रवार यातायात व्यवस्था कार्यालय, सवारी चालक अनुमती पत्र, सानो भर्याङका कर्मचारीलाई संक्रमण देखिएपछि शुक्रबारदेखि सेवा बन्द भएको हो।
यातायात व्यवस्था कार्यालय, गुर्जुधारामा पनि एक कर्मचारीलाई कोरोना पोजेटिभ देखिएको कार्यालय प्रमुख दिपक कुमार पोखरेलले जानकारी दिए।
‘हाम्रो एक जना कर्मचारीलाई संक्रमण देखिएको छ। तर हालसम्म सावधानी अपनाएर काम गरिरहेका छौं। केही समय कार्यालय बन्द गर्न हामीले सिसिएमसीसगँ कुरा राखेका छौं,’ उनले भने।
वि.सं.२०७७ असोज १९ सोमवार १४:१६ मा प्रकाशित
