काठमाडौं । नेपाल रेडक्रस सोसाइटी केन्द्रीय तदर्थ समितिले यही असोज २८–३० गतेका लागि तोकेको ४८ औं महाधिवेशनलाई अर्को व्यस्थापन नहुन्जेलसम्मका लागि जिल्ला प्रशासन कार्यालय काठमाडौँले स्थगित गरिदिएको छ ।
जिल्ला प्रशासन कार्यालय काठमाडौँले असोज १६ गते नेपाल रेडक्रस सोसाइटीको तदर्थ समितिलाई पत्र पठाउँदै महाधिवेशन स्थगित गर्न निर्देशन दिएको हो ।
नेपाल रेडक्रस सोसाइटीले २०७७ असोज ११ गते श्वेतपत्र जारी गर्दै महाधिवेशन तोकेको थियो । तर, जिल्ला प्रशासन कार्यालयले संस्थाको नविकरण नगरेको र काठमाडौँ उपत्यकामा कोभिड–१९ को संक्रमण उच्च दरमा वृद्धि भइरहेको सन्दर्भमा नेपाल सरकार मन्त्रिपरिषदको मिति ०७७ भदौ २९ गतेको निर्णय बमोजिम कुनै पनि सभा, समारोह, सम्मेलन लगायत कार्यक्रम गर्न रोक लगाएको अवस्थामा अर्को आदेश नभएसम्मका लागि स्थगित गराउन निर्देशन दिइएको’ काठमाडौँ जिल्ला प्रशासन कार्यालयले नेपाल रेडक्रस सोसाइटीलाई लेखेको पत्रमा उल्लेख छ ।
वि.सं.२०७७ असोज २२ बिहीवार १२:३१ मा प्रकाशित