भक्तपुर । मध्यपुर थिमि नगरपालिका–८ का वडाध्यक्ष देवकृष्ण मोय् श्रेष्ठलाई कोरोना संक्रमण भएको छ । श्रेष्ठलाई असोज २१ गते कोरोना संक्रमण पुष्टि भएको हो ।
वडाध्यक्षलाई कोरोना संक्रमणपछि वडा कार्यालय सात दिन बन्द गरिएको छ । वडाका प्रमुख प्रशासकीय अधिकृतले एक सूचना जारी गर्दै असोज २२ देखि २८ सम्म वडा कार्यालय बन्द हुने जानकारी दिएको हो।
वडा कार्यालय बन्द भएको अवस्थामा सर्वसाधारणको पिसिआर परीक्षण गर्नु परेमा शहरी स्वास्थ्य केन्द्र बोडेमा सम्पर्क गर्न आग्रह गरिएको छ ।
यसैगरी वडा नम्बर १ ले पनि एक साता वडा कार्यालयबाट हुने सबै सेवा बन्द गरेको छ। बढ्दो कोरोना संक्रमणबीच वडा कार्यालयमा बढेको घुइँचोले कर्मचारीहरु समेत उच्च जोखिममा परेको भन्दै बिहीबार सूचना जारी गर्दै असोज २८ सम्मका लागि सबै सेवा बन्द गरेको जनाएको हो। यस अवधिमा कोभिड–१९ सँग सम्बन्धित अत्यावश्यक सेवा भने सञ्चालन रहने जनाइएको छ।
वि.सं.२०७७ असोज २३ शुक्रवार १२:२५ मा प्रकाशित
