कोभिडले सार्क क्षेत्रमा पारेको प्रभाव सन्दर्भमा सदस्य राष्ट्रहरुबीच सहकार्यका लागि एकजुट हुन आवश्यक : उपाध्यक्ष कडेल

काठमाडौं । राष्ट्रिय योजना आयोगका उपाध्यक्ष प्रा.डा. पुष्पराज कडेलले महामारीको रुपमा फैलिएको कोरोना संक्रमण (कोभिड १९) ले दक्षिण एसिया क्षेत्रमा सामाजिक, आर्थिक प्रभाव पारेको सन्दर्भमा सार्क सदस्य राष्ट्रहरुबीच सहकार्यका लागि एकजुट हुनु आवश्यक रहेको बताउनुभयो ।

उपाध्यक्ष कडेलले पाकिस्तान सरकारको आयोजनामा दक्षिण एसियामा दिगो विकास लक्ष्य हासिल गर्ने सम्बन्धमा विद्युतीय माध्यमबाट सम्पन्न पहिलो सार्क योजना मन्त्रीस्तरीय बैठकमा आज नेपाली प्रतिनिधिमण्डलको नेतृत्व गरी सहभागिता जनाउँदै सो कुरा बताउनु भएको हो । उहाँले दिगो विकास लक्ष्यको प्रगति तथा नेपालले हालसम्म अवलम्बन गरेका कानूनी, नीतिगत तथा संरचनागत पक्षहरुको बारेमा उल्लेख गर्नुभएको थियो । उपाध्यक्ष कडेलले एजेण्डा २०३० शुरुवात भएको पाँच बर्ष बितिसकेको तथासाथै, सार्कको संस्थापक सदस्य भएको तथा वर्तमान अध्यक्ष भएको हैसियतले यस क्षेत्रको विकासका लागि सहकर्य गर्न नेपाल सदैव प्रतिबद्ध रहेको विषयमा समेत जोड दिनुभयो । वहाँले सबै राष्ट्रहरुले अवलम्बन गरेका असल अभ्यासहरु एकआपसमा आदानप्रदान गर्नुका साथै सार्क क्षेत्रमा दिगो विकास लक्ष्य प्राप्ति सम्बन्धी विस्तृत अध्ययन गर्नु आवश्यक रहेको कुरा औंल्याउनु भयो ।


सो अवसरमा उपाध्यक्ष कडेलले दिगो विकास लक्ष्य हासिल गर्नका लागि वर्तमान वित्तीय अभाव तथा प्रविधि, क्षमता विकास जस्ता पक्षहरुलाई महत्व दिनुपर्ने विषयमा जोड दिनुभयो । साथै, उहाँले विश्व व्यापी महामारीको रुपमा फैलिरहेको कोरोना संक्रमण,कोभिड १९को कारण स्वास्थ्य, सामाजिक तथा आर्थिक क्षेत्रमा पारेको नकारात्मक प्रभावलाई पार गरी सार्क क्षेत्रमा व्याप्त चरम गरिबीको अन्त्य गरी आर्थिक समृद्धि तर्फ लम्कनु पर्ने र सोको लागि सबै सार्क सदस्य राष्ट्रहरु एकीकृत रुपमा प्रतिबद्ध भई अघि बढ्नुपर्ने बताउनुभयो ।

सो बैठकमा सबै सार्क राष्ट्रका योजना मन्त्रीहरु र अन्य प्रतिनिधिहरुले सहभागिता जनाउनु भएको थियो । उपाध्यक्ष कडेलले नेतृत्व गर्नुभएको नेपाली प्रतिनिधिमण्डलमा राष्ट्रिय योजना आयोगका सदस्य सचिव केवल प्रसाद भण्डारी, सहसचिव खोमराज कोइराला तथा सम्वद्ध पदाधिकारीहरुको उपस्थिति रहेको थियो ।

उक्त बैठकमा २०७७/०८/०८ गते तदनुसार २३ नोभेम्बर, २०२० मा सम्पन्न पहिलो सार्क योजना सचिवस्तरीय बैठकको प्रतिवेदन पारित गरिएको थियो । यसका साथै सार्क सदस्य राष्ट्रका प्रतिनिधिमण्डलका मन्त्री तथा टोली नेताले आ आफ्नो राष्ट्रमा दिगो विकास लक्ष्यमा भएका प्रगति र सो सम्बन्धमा भएका क्षेत्रीय सहयोग तथा समन्वयका विषयमा मन्तव्य प्रस्तुत गर्नुभएको थियो ।

२०७७ मंशिर १० गते २०:५१ मा प्रकाशित

You can share this post!

मेरो उम्मेदवारी निजी क्षेत्रले राज्यबाट अभिभावकत्व पाउनका लागि हो : चन्द्र ढकाल - अन्तरवार्ता

मेरो उम्मेदवारी निजी क्षेत्रले राज्यबाट अभिभावकत्व पाउनका लागि हो : चन्द्र ढकाल - अन्तरवार्ता

Related posts