काठमाडौं । नागढुंगा–सिस्नेखोला सुरुङमार्गको पोर्टल (सुरुङभित्र छिर्ने मुख) बनाएर प्वाल पार्ने काम सुरु भएको छ ।
काठमाडौं र धादिङ दुवैतर्फ काम अघि बढाइएको नागढुंगा–सिस्नेखोला सुरुङ आयोजनाले जनाएको छ । एक महिनाभित्र विस्फोट गराउने काम सुरु हुने आयोजनाको भनाइ छ । त्यसका लागि भारतबाट ३ सय टन विस्फोटक पदार्थ ल्याइएको छ ।
विस्फोटक पदार्थबिनै करिब ३० मिटर प्वाल पारिने सडक विभागअन्तर्गत विकास सहायता कार्यान्वयन महाशाखा प्रमुख अर्जुनजंग थापाले जानकारी दिए । ‘विस्फोट गराउने काम अहिले नै सुरु हुँदैन,’ उनले भने, ‘सुरुङको मुखबाट काम हुँदै छ, करिब ३० मिटर प्वाल पारेपछि मात्र विस्फोटक पदार्थ प्रयोग हुनेछ ।’ सुरुङ निर्माण थालेको एक वर्ष बित्यो ।
अहिलेसम्म सोचेजस्तो प्रगति देखिएको छैन । ठेक्का सम्झौताअनुसार ४२ महिनाभित्र निर्माण सक्नुपर्नेछ । निर्माणको समय ३० महिना मात्र बाँकी छ । कान्तिपुर दैनिकमा विमल खतिवडाले खबर लेखेका छन् ।
वि.सं.२०७७ मंसिर १९ शुक्रवार ०९:०७ मा प्रकाशित
