काठमाडौं । नेपाल स्टक एक्सचेञ्ज (नेप्से)ले सोमवार चिलिमे हाइड्रोपावर कम्पनी लिमिटेडको बोनस शेयरको मूल्य समायोजन गरेको छ ।नेप्सेले १० प्रतिशत बोनस शेयरको समायोजनपछि शेयरमूल्य रू. ५७० तोकेको छ ।
कम्पनीको आइतवार कायम अन्तिम शेयरमूल्य रू. ६२७ को आधारमा शेयरमूल्य समायोजन भएको हो । कम्पनीले लाभांश तथा साधारण सभा प्रयोजनार्थ सोमवार बुकक्लोज गरेसँगै नेप्सेले शेयरमूल्य समायोजन गरेको हो ।
बुक क्लोजको आधारमा आइतवारसम्म कायम शेयरधनीहरुले मात्र सभामा भाग लिन र लाभांश प्राप्त गर्न सक्नेछन् ।कम्पनीले १० प्रतिशत बोनस शेयर र १० प्रतिशत नगद लाभांश (कर समेत) पारित गर्न पुस १२ गते २४औं वार्षिक साधारण सभा बोलाएको छ ।
हाल कम्पनीको चुक्तापँजी रू. ५ अर्ब ७० करोड ९७ लाख ६२ हजार ९३८ रहेको छ । सोही पूँजीको आधारमा कम्पनीले लाभांश वितरण गर्न लागेको हो ।
वि.सं.२०७७ मंसिर २९ सोमवार ११:२० मा प्रकाशित
