काठमाडौँ । ५ लाख ५६ हजार ४ सय ८७ निजी आवासको पुनर्निर्माण सम्पन्न भएको राष्ट्रिय पुनर्निर्माण प्राधिकरण जनाएको छ ।
राष्ट्रिय पुनर्निर्माण प्राधिकरणको छैटौँ स्थापना दिवसका अवसरमा बबरमहल काठमाडौँमा आज आयोजित पत्रकार भेटघाट कार्यक्रममा प्राधिकरणका प्रमुख कार्यकारी अधिकृत सुशील ज्ञवालीले भूकम्पबाट क्षति भएका कुल ७ लाख ९६ हजार २ सय ४५ घर मध्ये ५ लाख ५६ हजार ४ सय ८७ निजी आवासको पुनर्निर्माण सम्पन्न भएको र १ लाख ६८ हजार ८३ घर पुनर्निर्माणको अन्तिम चरणमा रहेको जानकारी दिनुभयो ।
त्यस्तै ४ हजार २ सय ५७ लाभग्राहीलाई सुरक्षित आवासका लागि जग्गा उपलब्ध गराइएको छ भने निर्माणाधीन १३० एकीकृत बस्ती मध्ये ५० वटा बस्तीको पुनर्निर्माण सम्पन्न भइसकेको पनि कार्यकारी अधिकृत ज्ञवालीले जानकारी दिनुभयो ।
सांस्कृतिक तथा पुरातात्त्विक सम्पदा तर्फ क्षति ग्रस्त ९ सय २० वटा सम्पदा मध्ये ४ सय ६५ वटा सम्पदाको पुनर्निर्माण सम्पन्न भएको प्राधिकरणले जनाएको छ ।
धरहराको २० औँ तला पुनर्निर्माण भइरहेको र सिंहदरबारको मुख्य प्रशासनिक भवनको उत्तर, दक्षिण र पूर्वी भागको काम यसै महिनाभित्र सम्पन्न गरी सक्ने पनि प्राधिकरणका कार्यकारी निर्देशक ज्ञवालीले जानकारी दिनुभयो ।
त्यस्तै भूकम्पबाट क्षतिग्रस्त भएका कुल ७ हजार ५ सय ५३ विद्यालय मध्ये ६ हजार ८५ विद्यालयको पुनर्निर्माण सम्पन्न भएको छ भने कुल १ हजार १ सय ९७ वटा क्षतिग्रस्त स्वास्थ्य संस्था मध्य ६ सय ९८ स्वास्थ्य संस्थाको पुनर्निर्माण सम्पन्न भएको प्राधिकरणले जनाएको छ ।
भूकम्पबाट क्षतिग्रस्त कुल ४ सय १५ सरकारी भवन मध्ये ३७४ वटा सरकारी भवनको पुनर्निर्माण काम सम्पन्न भएको पनि प्राधिकरणले जनाएको छ ।
वि.सं.२०७७ पुस १० शुक्रवार १८:०६ मा प्रकाशित