काठमाडौं । वाणिज्य बैंकहरुमध्ये एक मात्र महिला सिइओ (मेगा बैंककी प्रमुख कार्यकारी अधिकृत) अनुपमा खुञ्जेलीले वार्षिक एक करोड ७० लाख रुपैयाँ तलब सुविधा बुझ्नु भएको छ । उहाँले तलब मात्रै एक करोड २ लाख रुपैयाँ बुझ्नुभएको हो ।
बैंकले सार्वजनिक गरेको गत आर्थिक वर्ष २०७६र७७ को लेखापरीक्षण प्रतिवेदनमा उल्लेख भए अनुसार खुञ्जेलीले दसैंभत्ता ८ लाख ५० हजार रुपैयाँ प्राप्त गर्नुभएको छ ।
त्यस्तै बोनस तथा कल्याणकारी कोष बापत ५६ लाख ७९ हजार रुपैयाँ बुझ्नुभएको छ । यसबाहेक उहाँले गाडी सुविधा, चालक, मोबाइल खर्च, बिमा र ऐनबमोजिम बोनससमेत प्राप्त गर्नुहुन्छ ।
त्यस्तै प्रवन्धक तथा उच्च व्यवस्थापनमा रहेका कर्मचारीहरुले गत आर्थिक वर्षमा ५ करोड १२ लाख रुपैयाँ तलब बुझेका छन्। उनीहरुले थप तीन करोड ३१ लाख रुपैयाँ भत्ता प्राप्त गरेका छन्।
सञ्चालकहरुले गत आर्थिक वर्षमा बैठक भत्ताबापत २७ लाख ३९ हजार रुपैयाँ बुझेका छन्। उनीहरुले मोबाइल तथा पत्रपत्रिका खर्चका लागि भन्दै १० लाख ८ हजार रुपैयाँ प्राप्त गरेका छन्।
बैंकले पुस २९ गते दसौं वार्षिक साधारणसभा बोलाएको छ । साधारणसभामा सेयरधनीहरुका लागि भने गत वर्षको मुनाफाबाट ३.०५ प्रतिशत नगद लाभांश र १० प्रतिशत बोनस सेयरको प्रस्ताव लैजाने भएको छ ।
वि.सं.२०७७ पुस २३ बिहीवार १२:२४ मा प्रकाशित