बारा । मालपोत कार्यालय सिमरा, बारामा बैङ्कको किर्ते सहिछाप गरी एक लेखापढी व्यवसायीले भौचर दाखिला गरेको पाइएको छ ।
जीतपुुरसिमरा उपमहानगरपालिका वडा नम्बर ३ स्थित मालपोत कार्यालय सिमरा कार्यालय छेउमै रहेको जय चुुरियामाई लेखापढी सञ्चालन गरी बस्ने लेखनदास अवधेश महत्तो कहार बैङ्कको किर्ते सही छाप गरी फरार भएका छन् ।
लेखनदास कहारले पुँजीगत लाभ कर ५९ हजार ८ सय ५० रुपैयाँ र राजस्व ४६ हजार ३ सय ८३ गरी जम्मा एक लाख ६ हजार २ सय ३३ रुपैयाँ सिद्धार्थ बैङ्कको भौचरमा किर्ते सही, छाप गरी मालपोत कार्यालयमा बुझाएका थिए ।
मालपोत कार्यालयलाई भौचरको सही, छापमा शङ्का लागि अनुसन्धान गर्दै जाँदा सिद्धार्थ बैङ्कको किर्ते सही र छाप प्रयोग गरिएको भेटिएको मालपोत कार्यालय सिमराका प्रमुख मनोज कुमार खनालले बताउनुभयो ।
उहाँले आवश्यक कारबाहीको लागि विभागमा पत्र पठाउने जानकारी दिनुभयो । जीतपुुरसिमरा उपमहानगरपालिका वडा नं.८ स्थित रमौलिमा रहेको जग्गा बिक्री गर्न पुगेका अन्हिया कोइरिन र खरिद गर्न पुगेका बन्दी सिलवालसँग रकम लिई लेखनदास कहारले सो बापतको रकमको जाली भौचर मालपोत कार्यालयमा बुझाएका थिए ।
लेखनदास कहार यसभन्दा अगाडि पनि पुर्जा जालसाजी र बैङ्क दृष्टि बन्धक जालसाजी लगायतका कार्यमा दोषी साबित भएका व्यक्ति हुन् । प्रहरीले उनको फर्मबाट नगद एक लाख १८ हजार ५ सय रुपैयाँ बरामद गरेको छ ।
वि.सं.२०७७ पुस २७ सोमवार १४:४२ मा प्रकाशित