काठमाडौं । साताको पहिलो कारोबार दिन आइतबार नेप्से दोहोरो अंकले बढेको छ ।
आज २८ दशमलव ४६ अंकले बढेर नेप्से २३ सय १५ विन्दुमा पुगेको हो । यो अहिलेसम्मकै उच्च विन्दु हो । उक्त दिनजलविद्युत् बाहेक अरू सबै समूहको शेयर बढेको छ ।
व्यापार समूहको शेयर २ सय ३२ अंकले, विकास बैंक समूहको १ सय १० अंकले, उत्पादन समूहको ४९, माइक्रो फाइनान्सको १ सय १५, अन्यको ६०, फाइनान्सको २५, जीवन बीमाको २ सय २१ र निर्जीवन बीमा समूहको शेयर ७८ अंकले बढेको छ ।
आइतबार २०८ कम्पनीका एक करोड ५० लाख ३५ हजार कित्ता शेयर ६ अर्ब ३७ करोड ४२ लाख रुपैयाँमा कारोबार भए । सबैभन्दा धेरै नेपाल टेलिकमको ५८ करोड १० लाख रुपैयाँको शेयर किनबेच भएको छ ।
आइतबार साल्ट ट्रेडिङ कर्पोरेशनका शेयरधनीले १० प्रतिशत कमाएका छन् भने १५ वटा कम्पनीका शेयरधनीले नौ प्रतिशतभन्दा धेरैका दरले कमाएका छन् ।
समग्र बजार बढे पनि युनाइटेड फाइनान्सका शेयरधनीले भने झण्डै ६ प्रतिशत गुमाएका छन् ।
वि.सं.२०७७ माघ ४ आइतवार १५:३२ मा प्रकाशित
