काठमाडौं । ग्रीनलाइफ हाइड्रोपावर कम्पनीको साधारण सेयर (आइपीओ)मा आवेदन दिने आज अन्तिम दिन हो । उक्त कम्पनीको आइपीओ २३ गतेबाट बिक्री खुला भएको थियो । अहिले नै कम्पनीको आईपीओमा माग भन्दा बढी आवेदन परिसकेको छ ।
माघ भन्दा ६ गुणा बढी आवेदन दिइसकेका छन् । सोमबार ४ः१८ बजेसम्म मा १० लाख ७६ हजार ९१४ जना सर्वसाधारण लगानीकर्ताले १ करोड ९५ लाख २० हजार ७० कित्ताका लागि आवेदन दिएका छन् । कुल १ अर्ब ९५ करोड २० लाख ७ हजार रुपैयाँ बराबरको आवेदन परेको हो ।
कम्पनीले ३४ लाख ९६ हजार ४०० कित्तामध्ये ६९ हजार ९२८ कित्ता कर्मचारी र १ लाख ७४ हजार ८२० कित्ता सेयर सामूहिक लगानी कोषलाई छुट्याएर सर्वसाधारणका लागि ३२ लाख ५१ हजार ६५२ कित्ता निष्काशन गरेको हो ।
लगानीकर्ताले न्यूनतम १० देखि अधिकतम १ लाख कित्तासम्म आवेदन दिन सक्नेछन् । आवेदन दिनको लागि सी–आस्वा सदस्य रहेका बैंक तथा वित्तीय संस्था र मेरोसेयरबाट सकिने छ ।
वि.सं.२०७७ माघ २७ मंगलवार ०९:५४ मा प्रकाशित