काठमाडौं । नेपाल स्टक एक्सचेन्ज (नेप्से)का अनुसार अनलाइनको यूजरनेम र पासवर्ड लिने सेयर लगानीकर्ताको संख्या ३ लाख ७६ हजार २६१ जना पुगेका छन् ।
३ लाख ७६ हजार २६१ जनाले अनलाइनको यूजरनेम र पासवर्ड लिएपनि अनलाइन लिएर सकृय रहने लगानीकर्ताको संख्या १ लाख ९५ हजार ९८९ जना रहेका छन् । नेप्सेका अनुसार आइतबारसम्म ५ लाख ५० हजार ४०९ जना सकृय लगानीकर्ता रहेका छन् । सकृय लगानीकर्तामा अनलाइन अफलाइन दुवै समावेश गरिएको छ ।
नेप्सेका अनुसार सबैभन्दा बढी नाशा सेक्युरिटिजबाट ३६ हजार ३२७ जनाले अनलाइन सेवा लिएका छन् । त्यस्तै सानी सेक्युरिटिजबाट २६ हजार १ जना, दिपशिखा धितोपत्र कारोबार कम्पनीबाट १६ हजार ४२२ जना, मिदास स्टक ब्रोकिङ कम्पनीबाट १६ हजार ६७ जना, भिजन सेक्युरिटिजबाट १५ हजार ९५५ जनाले अनलाइन सेवा लिएका छन् । सबैभन्दा थोरै अनलाइन सेवा सगरमाथा सेक्युरिटिजबाट ५९३ जनाले सेवा लिएको नेप्सेको भनाइ छ ।
विश्वब्यापी रुपमा सुरु भएको कोरोनाको महामारीपछि सेयर कारोबार अनलाइनबाट सुरु भएको छ । जसका कारण पनि अनलाइनको यूजर नेम र पासवर्ड लिनेको संख्या क्रमिक रुपमा बढेको छ । अनलाइनको यूजर नेम र पासवर्ड लिएपछि आफुलाई पायक परेको जुनसुकै स्थानबाट पनि सेयर कारोबार गर्न सकिन्छ । त्यसले गर्दा पनि अनलाइन सेवा लिनेको संख्या बढेको छ ।
वि.सं.२०७७ फागुन १० सोमवार ११:३८ मा प्रकाशित