काठमाडौं । राष्ट्रिय वाणिज्य बैंक भरतपुर चितवन शाखाको भौचर, छाप र कर्मचारीहरुको दस्तखत समेत किर्ते गर्ने एक जनालाई प्रहरीले पक्राउ गरेको छ ।
प्रहरीका अनुसार लिखत सम्बन्धि कसूरमा संलग्न रहेको अभियोगमा काठमाडौं तारकेश्वर नगरपालिका-६ बस्ने चितवन भरतपुर नगरपालिका-११ घर भएका मालपोत कार्यालय भरतपुर चितवनमा कार्यरत तत्कालीन लेखा अधिकृत ५७ वर्षीय रिठ्ठे परियारलाई प्रहरीले पक्राउ गरेको छ ।
प्रहरीका अनुसार परियारले १ करोड १७ लाख २४ हजार ५ सय ३८ रुपैयाँ लिखत सम्बन्धी कसूर गरी सरकारी रकम अपचलन गरेको प्रारम्भिक अनुसान्धानको क्रममा खुलेको छ । परियारलाई तारकेश्वर नगरपालिका-६ मा लुकिछिपी बसेको अवस्थामा प्रहरी प्रधान कार्यालय केन्द्रीय अनुसन्धान ब्यूरोले पक्राउ गरेको हो । यस सम्बन्धमा प्रहरीले थप अनुसन्धान गरिरहेको जनाएको छ ।
वि.सं.२०७७ फागुन १३ बिहीवार १२:१६ मा प्रकाशित